იმ კომპანიებში, რომლებსაც სათავო ოფისი კალიფორნიის შტატში აქვთ, მხოლოდ კაცებით დაკომპლექტებული ბორდები აიკრძალა. კალიფორნია პირველი შტატია ამერიკაში, რომელმაც მსგავსი კანონი მიიღო.

კომპანიებს ბორდში მინიმუმ ერთი ქალის დამატების ვალდებულება 2019 წლის ბოლომდე აქვთ, წინააღმდეგ შემთხვევაში, სანქციები დაუწესდებათ.

კანონი ახალ ვალდებულებას უწესებს იმ კომპანიებსაც, რომლებსაც 5 დირექტორი ჰყავთ — მისი მიხედვით, აღმასრულებლის ორი პოზიცია ქალმა უნდა დაიკავოს. იმ შემთხევაში, თუ დირექტორის რაოდენობა 6 ან მეტია, კომპანია ვალდებულია, რომ მინიმუმ სამი ქალი დირექტორი ჰყავდეს. ამ ცვლილების ვადა 2021 წლის ბოლომდეა.

როგორც კალიფორნიის სენატორმა ჰანა-ბეთ ჯეკსონმა Wall Street Journal-თან ინტერვიუში თქვა, კალიფორნიაში დარეგისტრირებული კომპანიების ერთ მეოთხედს ბორდში ერთი ქალიც კი არ ჰყავდა:

"ეს კი იმის მიუხედავად, რომ უამრავი დამოუკიდებელი კვლევა აჩვენებდა, რომ ბორდში ქალის ყოფნა კომპანიისთვის მომგებიანი იყო".

კანონის ოპოზიციონერები ამბობენ, რომ კვოტები კომპანიებს პრობლემას შეუქმნის, თუ ხელმძღვანელის პოზიციაზე ან ბორდში არაკვალიფიციური ქალი თანამშრომელი მოხვდება. ისინი ასევე ამბობენ, რომ ახალი კანონი კაც კანდიდატებს დისკრიმინაციულ გარემოს უქმნის.

მსგავსი კანონი ამერიკაში პირველია, თუმცა პრაქტიკა ევროპის ქვეყნებში გავრცელებულია. მაგალითად ნორვეგიაში, რომელიც დიდ კომპანიებს ავალდებულებს, რომ ბორდის წარმომადგენლების 40% ქალები იყვნენ.