ერთ-ერთი ცნობილი მათემატიკოსი აცხადებს, რომ მან 160 წლის წინ შემუშავებული რიმანის ჰიპოთეზა დაამოწმა.

მაიკლ ატიას მსოფლიოში ორი ყველაზე პრესტიჟული მათემატიკური ჯილდო უკვე მოგებული აქვს. თავისი ახალი ნაშრომი კი მან გერმანიაში ერთ-ერთ სამეცნიერო ფორუმზე წარმოადგინა. თუ დადასტურდება, რომ მან რიმანის ჰიპოთეზა მართლაც დაამოწმა ის ჯილდოდ ერთ მილიონ დოლარს მიიღებს.

ჰიპოთეზის დასამოწმებლად საჭიროა ფორმულა, რომელიც მარტივი რიცხვების განაწილების კანონზომიერებას დაადგენს. ისტორიულად მიჩნეულია, რომ მარტივი რიცხვების განაწილების პრინციპი შემთხვევითია. მარტივი რიცხვები ისეთი რიცხვებია, რომლებიც მხოლოდ საკუთარ თავსა და ერთზე იყოფა.

1859 წელს ბერნჰარდ რიმანმა ჩამოაყალიბა ჰიპოთეზა, რომელიც მარტივი რიცხვების განაწილების კანონზომიერების დადგენას ცდილობს.

რიმანის ჰიპოთეზა უარყოფს, რომ მარტივი რიცხვების განაწილება შემთხვევითია. ის ამბობს, რომ ასეთი რიცხვების განაწილების აღწერა სპეციალური ზეტა ფუნქციით შეიძლება. ამ დრომდე შემოწმებულია 10 000 000 000 000 მარტივი რიცხვი და ყველა მათგანი რიმანის ჰიპოთეზასთან თანხვედრაშია, თუმცა არ არსებობს მტკიცებულება, რომ ყველა მარტივი რიცხვი ამ კანონზომიერებას მიჰყვება.

ერთ მილიონ დოლარს კი ის მოიგებს ვინც დაამტკიცებს, რომ ზეტა ფუნქციას ყველა მარტივი რიცხვი ემორჩილება. მაიკლ ატია ამბობს, რომ მან სწორედ ამის დამტკიცება შეძლო.

ამჟამად რიმანის ჰიპოთეზა მათემატიკაში ერთ-ერთ ყველაზე რთულ პრობლემად მიიჩნევა.