წითელი ფეხსაცმელი, რომელიც ჯუდი გარლანდს 1939 წლის ფილმში დოროთის როლის შესრულებისას ეცვა, FBI-მ იპოვა. ფეხსაცმელი, რომელსაც ოზის ჯადოქარში განსაკუთრებული დანიშნულება ჰქონდა, 13 წლის წინ მინესოტაში მდებარე ჯუდი გარლანდის მუზეუმიდან მოიპარეს.

წითელი ფეხსაცმლის თაობაზე ინფორმაცია გამომძიებლებს 2017 წელს ანონიმურმა წყარომ მიაწოდა.

"ჩვენი პრიორიტეტი ფეხსაცმელების გადარჩენა და მისი უსაფრთხოდ დაბრუნება იყო", - განაცხადა FBI-ის აგენტმა კრისტოფერ დუდლიმ.

წითელი ფეხსაცმელები მუზეუმში 2005 წელს კოლექციონერმა მაიკლ შოუმ განათავსა. მუზეუმმა შოუს შესთავაზა, რომ ისინი ფეხსაცმელებს ყოველ ღამით საცავში შეინახავდნენ, თუმცა შოუ არ დათანხმდა, რადგან, არ სურდა, რომ ღირებულ ნივთს ყოველდღიურად შეხებოდნენ. ის დარწმუნებული იყო, რომ მუზეუმი მის დაცვას ისედაც შეძლებდა.

როგორც აღმოჩნდა, შოუ ცდებოდა. იმავე წლის აგვისტოს ერთ-ერთ დილას ფეხსაცმელები გაქრა, განგაშის სიგნალი კი, დროულად არ ჩაირთო.

"ასეთი ცუდი რამ ჩვენს მუზეუმში არასდროს მომხდარა, ყველანი ვტირით", - თქვა მაშინ მუზეუმის დამაარსებელმა.

ფეხსაცმელების დაბრუნებაზე პოლიციამ ჯილდოდ 250 000 აშშ დოლარი დააწესა, მოგვიანებით კი, ანონიმურმა დონორმა განაცხადა, რომ მილიონ დოლარს გადაუხდიდა მას, ვინც ფეხსაცმლის ადგილსამყოფელზე ინფორმაციას მიაწვდიდა.

ფოტო: Metro-Goldwyn-Mayer