თურქეთის პრეზიდენტის, რეჯეპ ტაეპ ერდოღანის თქმით, საერთაშორისო ვაჭრობაში დოლარის დომინირება უნდა შეწყდეს. ამის შესახებ მან 2 სექტემბერს თურქეთ-ყირგიზეთის ბიზნესფორუმზე განაცხადა.

მისივე თქმით, დოლარზე დამოკიდებულება ყოველდღიურად უფრო მეტად ტვირთი ხდება, ვიდრე მოხერხებულობა. ერდოღანის განმარტებით, ვაჭრობისთვის ქვეყნებმა ადგილობრივი ვალუტა უნდა გამოიყენონ.

"ჩვენ ქვეყანაზეც შეტევა ამის ნათელი მაგალითია. სავალუტო მანიპულაციებით ცდილობენ თურქეთის ძლიერი ეკონომიკა ეჭვქვეშ დააყენონ", - განაცხადა ერდოღანმა.

ანკარასა და ვაშინგტონს შორის ურთიერთობა მას შემდეგ დაიძაბა, რაც თურქეთში ამერიკელი პასტორი ენდრიუ ბრანსონი დააკავეს.

ერდოღანი მოითხოვს მისი ყველაზე დიდი მტრის, ფეთჰულა გიულენის გადაცემას თურქეთისთვის. გიულენი 1999 წლიდან ამერიკაში ცხოვრობს. სწორედ გიულენს მიიჩნევს ერდოღანი 2016 წლის სამხედრო აჯანყების ორგანიზატორად.

თავის მხრივ, აშშ ერდოღანისგან ამერიკელი პასტორის ენდრიუ ბრანსონის გათავისუფლებას ითხოვს. თურქეთი ბრენსონს ტერორიზმსა და ფეთჰულა გიულენის ორგანიზაციის წევრობას ედავება. ამერიკელმა პასტორმა 21 თვე თურქულ საპატიმროში გაატარა, ხოლო წინა თვეში მისი ჯანმრთელობის მდგომარეობის გაუარესების გამო მას პატიმრობა შინა პატიმრობით შეუცვალეს. პასტორი ბრანსონის საქმის გამო აშშ-მ თურქეთის ორ მინისტრს სანქციები დაუწესა.

გაიგეთ მეტი: