თბილისის მერს, კახა კალაძეს საქართველოში ბინადრობის უფლების მიღების გამკაცრება უნდა. ინიციატივასთან დაკავშირებით თბილისის მერმა თბილისის მთავრობის სხდომაზე ისაუბრა.

"კანონში არსებული ხარვეზების გამოსწორება გამომდინარეობს ჩვენი ქვეყნის ინტერესებიდან და ეროვნული უსაფრთხოებიდან", - ასე განმარტა ცვლილებების იდეა თბილისის მერმა.

კალაძის ინიციატივა:

  • უცხო ქვეყნის მოქალაქეს საქართველოში ბინადრობის ერთწლიანი უფლების მისაღებად $35 ათასი დოლარის ნაცვლად $100 ათასი დოლარის ღირებულების უძრავი ქონების შეძენა მოუწევს. მისი სხვა პირისთვის გადაცემის შემთხვევაში ბინადრობის უფლება გაუქმდება;
  • 300 ათასი ლარის ინვესტიციით უცხო ქვეყნის მოქალაქე ბინადრობის უვადო უფლებას ვერ მიიღებს, ის ვალდებული იქნება 300 ათასი ამერიკული დოლარის ინვესტიცია ჩადოს საქართველოში. ამ შემთხვევაშიც კი, ის არა მუდმივ, არამედ 5-წლიან უფლებას მოიპოვებს.

მერის თქმით, ის უკვე ესაუბრა საქართველოს პარლამენტის თავმჯდომარეს და დარწმუნებულია, რომ პარლამენტი ამ ინიციატივას მხარს დაუჭერს.