ჰაერის დაბინძურება ჩვენს ჯანმრთელობას იმაზე მეტ ზიანს აყენებს, ვიდრე მეცნიერებს აქამდე ეგონათ. ახალი კვლევის მიხედვით, ბინძურ ჰაერს გავლენა აქვს კოგნიტურ შესაძლებლობებზე, განსაკუთრებით — ასაკოვან კაცებში.

მეცნიერების ეროვნული აკადემიის მიერ გამოქვეყნებული კვლევის თანახმად, იმ ადამიანებს, რომლებიც დაბინძურებულ ჰაერს სუნთქავენ, ვერბალურ და მათემატიკურ ტესტებში დაბალი მაჩვენებლები აქვთ.

კოგნიტური შესაძლებლობების შესამოწმებელი ტესტი ჩინეთში დაახლოებით 32 ათას ადამიანს ჩაუტარდა. მათი ასაკი 10 წლიდან ზემოთ იყო. კვლევა 2010 წლიდან 2014 წლამდე გრძელდებოდა.

მეცნიერების ჯგუფმა აღმოაჩინა, რომ ჰაერის დაბინძურების მაჩვენებლის ზრდასთან ერთად, ვერბალური მონაცემები ასაკოვან კაცებს შორის საკმაოდ დაქვეითდა. კვლევის ერთ-ერთი ავტორის თქმით, დაბინძურებული ჰაერი ტვინის დაბერებაზე მოქმედებს. კოგნიტური შესაძლებლობების დაქვეითებასთან ერთად, იზრდება ალცჰაიმერისა და დემენციის რისკიც.

იმის გარდა, რომ კვლევა ჯანმრთელობის რამდენიმე პრობლემას უსვამს ხაზს, ხაზგასასმელია სხვა გავლენებიც — იმ ქალაქებში, რომლებშიც სმოგია ჩამოწოლილი, ეკონომიკური განვითარების შეფერხების რისკები შესაძლოა გაიზარდოს და ეს მოსახლეობის კეთილდღეობაზე უარყოფით გავლენას მოახდენს.

"დაბინძურებული ჰაერით გამოწვეული ზარალი და ზიანი იმაზე ბევრად მეტი შეიძლება აღმოჩნდეს, ვიდრე აქამდე გვეგონა", - აცხადებს კვლევის ავტორი.

მსოფლიო ჯანდაცვის ორგანიზაციის (WHO) 2016 წლის მონაცემების მიხედვით, ჰაერი ყველაზე მეტად აფრიკისა და აზიის რეგიონებშია დაბინძურებული და პლანეტაზე ყველა 10-დან 9 ადამიანი დაბინძურებულ ჰაერს სუნთქავს.