თელავის რაიონულმა სასამართლომ მძღოლს, რომელსაც 2018 წლის 9 ივნისს მოსწავლეების გადაყვანისას გომბორის უღელტეხილზე ავარია შეემთხვა, 8-წლიანი პატიმრობა მიუსაჯა. ამის შესახებ ინფორმაციას საქართველოს პროკურატურა ავრცელებს.

"[მძღოლმა] მოსახვევში გადაჭარბებული სიჩქარის გამო შესვლისას ვერ უზრუნველყო ავტომობილის უსაფრთხოდ მართვა, რის შედეგადაც ავტომანქანა გადავიდა გზიდან, შეეჯახა გზის დამცავ ჯებირს და ჯერ მცირე ზომის კლდეზე, შემდეგ კი საავტომობილო გზაზე გადავარდა", - წერია პროკურატურის მიერ გავრცელებულ განცხადებაში.

დაკავებულს პროკურატურამ ბრალი საქართველოს სისხლის სამართლის კოდექსის 276-ე მუხლის 1-ლი, მე-3 და მე-7 ნაწილებით (ავტომობილის მოძრაობის უსაფრთხოების ან ექსპლუატაციის წესის დარღვევა, რამაც გამოიწვია ჯანმრთელობის ნაკლებად მძიმე, მძიმე დაზიანება და ორი ან მეტი ადამიანის სიცოცხლის მოსპობა) წარედგინა და აღკვეთის ღონისძიების სახით პატიმრობა შეეფარდა. ავარიის დროს ოთხი ადამიანი გარდაიცვალა.