მთავარი პროკურატურის განცხადებით, თავდაცვის ყოფილი მინისტრის, თინა ხიდაშელის 1 აგვისტოს განცხადება, რომ სამართალდამცავები ინფორმირებულნი არიან თავდაცვის სამინისტროს საიდუმლო ობიექტებზე გარკვეული პირების უკანონო დაშვებაზე, სიმართლეს არ შეესაბამება. პროკურატურის პრესსამსახურის უფროსმა ნათია სუხიაშვილმა On.ge-ს განუცხადა, რომ მსგავსი შინაარსის ინფორმაცია პროკურატურას თავდაცვის სამინისტროდან არ მიუღია.

მისივე თქმით, ამ ეტაპზე საქმის გარემოებებში გარკვევა მიმდინარეობს და პროკურატურამ თავდაცვის სამინისტროს, შესაბამისი ინფორმაციის გამოთხოვის მიზნით, უკვე მიმართა.

თავდაცვის ყოფილი მინისტრის, თინა ხიდაშელის განცხადებით, საიდუმლო ინფორმაციის გავრცელების შესახებ სამართალდამცავებისთვის დიდი ხანია ცნობილია, თუმცა ამ ფაქტზე დაიწყო თუ არა გამოძიება ჯერჯერობით უცნობია.

გაერთიანებული შტაბის ყოფილი უფროსი, გენერალი გიგი კალანდაძე 31 ივლისის გადაცემა პოსტსკრიპტუმთან ინტერვიუში აცხადებს, რომ აგვისტოს ომის შემდეგ საქართველოს ტერიტორიაზე აშენებული საიდუმლო სამხედრო ობიექტების კოორდინატები და მთელი ინფორმაცია, მინდია ჯანელიძის მინისტრობის დროს, სხვა ქვეყნის სპეცსამსახურების ხელში აღმოჩნდა.

კალანდაძე აზუსტებს ინტერვიუში, რომ საუბარია, იმ საცეცხლე წერტილებზე და ცენტრალური მართვის შტაბზე, რომელსაც რუსული აგრესიის შემთხვევაში, საქართველო მტრისაგან უნდა დაეცვა.

რუსთავი 2-ის მიერ მოპოვებული მასალის თანახმად, ტრისტან წითელაშვილი, რომელზეც გენერალური კალანდაძე საუბრობს, ყოფილი სამხედროა.

პოლკოვნიკი წითელაშვილი, 2008 წლის აგვისტოს ომის შემდეგ დააკავეს და სამშობლოს ღალატისთვის პატიმრობა მიუსაჯეს. 2013 წლის იანვარში, ხელისუფლებაში ქართული ოცნების მოსვლის შემდეგ მან ციხე დატოვა.

კალანდაძე ინტერვიუში ამტკიცებს რომ წითელაშვილი, საცეცხლე წერტილებზე მინდია ჯანელიძის მინისტრობის დროს დანიშნულმა, გენინსპექციის თანამშრომელმა გოდერძი ორმოცაძემ შეიყვანა, რომელმაც საიდუმლო ბაზაზე შესვლა სამსახურეობრივი საშვით შეძლო.

გენერალი რუსთავი 2-თან ამბობს, რომ საიდუმლო ობიექტები წითელაშვილმა ფირზე გადაიღო. მისივე თქმით, გადაღების დროს წითელაშვილს ხელი სამხედროებმა შეუშალეს, თუმცა უშედეგოდ. სამხედროებმა, კალანდაძის ინფორმაცით, მიაწოდეს ინფორმაცია ზემდგომებს, თუმცა მინისტრმა საბოლოოდ აღნიშნულის გამოძიება არ დაიწყო, რის გამოც კალანდაძე ჯანელიძეს რუსულ სპეცსამსახურებთან თანამშრომლობაში სდებს ბრალს.

სახელმწიფო უსაფრთხოებისა და კრიზისების მართვის საბჭოს მდივანი მინდია ჯანელიძე P.S.-ის სიუჟეტში მოყვანილ ფაქტებს უარყოფს.

როგორც ჯანელიძემ სააგენტო IPN-ს განუცხადა, თავდაცვის მინისტრად მისი მუშაობის პერიოდში არ დაფიქსირებულა თავდაცვის სამინისტროს კუთვნილ საიდუმლო ობიექტზე გარეშე პირთა უკანონოდ შეღწევის არც ერთი შემთხვევა, ხოლო სამინისტროს თანამშრომლების მხრიდან არც ერთი გადაცდომა თუ დარღვევა არ დარჩენილა სათანადო რეაგირების გარეშე.