დედაქალაქის მერია ჰაერის დაბინძურების პრობლემის მოგვარების გეგმის წარდგენას გეგმავს. ამის შესახებ თბილისის მერმა, კახა კალაძემ მთავრობის სხდომაზე განაცხადა.

მისი თქმით, ეს საკითხი სასიცოცხლოდ მნიშვნელოვანია ყველა მოქალაქისთვის და მუნიციპალიტეტს მის მოსაგვარებლად არაპოპულარული ნაბიჯების გადადგმა მოუწევს, როგორც სატრანსპორტო პოლიტიკის, ასევე გარემოს დაცვის მიმართულებით.

"მე ძალიან დიდი იმედი მაქვს, რომ საზოგადოების მხრიდან იქნება მხარდაჭერა და თანადგომა, რადგან გარკვეულწილად, ჩვენ მოგვიწევს არაპოპულარული ნაბიჯების გადადგმა", - აღნიშნა დედაქალაქის მერმა.

კახა კალაძემ მერიის ადმინისტრაციასა და დაქვემდებარებულ სტრუქტურულ ერთეულებს ავტოპარკში არსებული ავტომანქანების ტექნიკური დათვალიერება დაავალა.

მისი თქმით, 1 ივლისიდან სავალდებულო ხდება სახელმწიფო ავტოპარკისა და იურიდიული პირების საკუთრებაში არსებული ავტოსატრანსპორტო საშუალებების ტექდათვალიერება და ეს იქნება პირველი ნაბიჯი, რომელიც ჰაერის დაბინძურების შემცირებისთვის გადაიდგმება. კალაძის განმარტებით, იგივე მიდგომა აქვს ცენტრალურ ხელისუფლებას.

"ჩვენ უნდა ვიყოთ პირველები, ვინც ამ ნაბიჯს გადადგამს. რა თქმა უნდა, ეს არ იქნება საკმარისი, მაგრამ ჩვენ უნდა ვიყოთ ლოკომოტივები. დედაქალაქში გაუმართავი ავტომანქანებით მოძრაობა იქნება გამორიცხული", - განაცხადა კახა კალაძემ.