საქართველოს პარლამენტის თავმჯდომარის, ირაკლი კობახიძის განცხადებით, ამერიკის შეერთებულ შტატებთან თავისუფალი ვაჭრობის ხელშეკრულების გაფორმება იქნება ძალიან მნიშვნელოვანი გზავნილი როგორც საქართველოს, ისე მსოფლიო თანამეგობრობისთვის, რომ აშშ არის საქართველოს ძალიან მყარი მხარდამჭერი და პარტნიორი. ამის შესახებ საქართველოს პარლამენტის თავმჯდომარემ კონგრესმენებთან - პიტერ როსკამთან და დევიდ პრაისთან შეხვედრის შემდეგ განაცხადა.

საქართველოს პარლამენტის პრესსამსახურის ინფორმაციით, შეხვედრაზე აშშ-ის კონგრესის დემოკრატიული პარტნიორობის თანათავმჯდომარეების - პიტერ როსკამისა და დევიდ პრაისის მიერ ინიცირებულ ორპარტიულ წერილზე ისაუბრეს, სადაც კონგრესმენები აშშ-ს სავაჭრო წარმომადგენელს საქართველოსთან თავისუფალი ვაჭრობის შესახებ შეთანხმების გაფორმების მოწოდებით მიმართავენ.

პარლამენტის თავმჯდომარის განცხადებით, მას იმედი აქვს, რომ ორმხრივი სავაჭრო შეთანხმების შესახებ ინიციატივა წარმატებული იქნება.

"ჩვენთვის ძალიან მნიშვნელოვანია ამ ხელშეკრულების გაფორმება როგორც ეკონომიკური თვალსაზრისით, ასევე, პოლიტიკური თვალსაზრისითაც", - განაცხადა შეხვედრის დასრულების შემდეგ ირაკლი კობახიძემ.

კონგრესმენები მოუწოდებენ აშშ-ის სავაჭრო წარმომადგენელს, ორმხრივი სავაჭრო შეთანხმების გასაფორმებლად საქართველოსთან მოლაპარაკებები დაიწყოს. მათი განმარტებით, აშშ-სა და საქართველოს შორის ეკონომიკური ინტეგრაციის გაღრმავება, კიდევ უფრო გააძლიერებს მშვიდობას, სტაბილურობასა და ეკონომიკურ განვითარებას რეგიონში.

აშშ-ის კონგრესს საქართველოს მხარდამჭერი ორპარტიული კანონპროექტი "Georgia Support Act" წარედგინა.