თბილისში შეჩერებული მშენებლობების განახლება იგეგმება, მფლობელები კი, შესაძლოა, დამატებითი ღირებულების გადასახადისგან გათავისუფლდნენ. მშენებლებთან მოლაპარაკებები უკვე დაწყებულია და რამდენიმე კვირაში დეტალები დაზუსტდება.

თბილისის მერმა, კახა კალაძემ დედაქალაქის მთავრობის სხდომაზე განაცხადა, რომ მან დაუსრულებელი მშენებლობების მიმართულებით, კონკრეტული გეგმის წარმოდგენა თავის მოადგილეს, ილია ელოშვილს დაავალა.

მერის თქმით, ასეთი შენობა-ნაგებობები ყველა რაიონშია და გარდა იმისა, რომ დედაქალაქის იერსახეს ამახინჯებს, ხშირ შემთხვევაში, ანტისანიტარიის ბუდედ არის ქცეული.

მთავრობის სხდომის დასრულების შემდეგ, ილია ელოშვილმა შეჩერებული მშენებლობის ოთხ ტიპზე ისაუბრა და პრობლემის მოგვარების განსხვავებული გზებზე გაამახვილა ყურადღება.

"პირველი კატეგორია არის მშენებლობები, რომლებიც შეჩერებულია, მაგრამ მფლობელი ადგილზეა. ისინი დაინტერესებულები არიან და სურთ მშენებლობის დასრულება. მეორე არის მშენებლობები, რომლებიც ფინანსური პრობლემების გამოა გაჩერებული და თითოეულის შესწავლა იქნება საჭირო. მესამე ტიპის მშენებლობების მფლობელებს იურიდიული დავები აქვთ და იურიდიულადაა შესასწავლი", - განაცხადა ილია ელოშვილმა.

მისი თქმით, მეოთხე ტიპი არის მშენებლობები, რომელთა მფლობელები არ ჰყავს. ამ შემთხვევაში მისაღები იქნება საკანონმდებლო გადაწყვეტილებები და დაკონსერვებისა და დემონტაჟის საკითხით განიხილება.