ერთიანი ნაციონალური მოძრაობის დეპუტატი აზერ სულეიმანოვი ადასტურებს, რომ ის მართლაც შეხვდა მარნეულის მაცხოვრებელს, ელჩინ ალახვერდოვს, რომლის ცემაშიცაა ბრალდებული. ჟურნალისტებთან საუბრისას ის უარყოფს ცემის ფაქტს და ამბობს, რომ ალახვერდოვს უთხრა, თუ რატომ გააკეთა მათი პარტიის სახელით ასეთი განცხადება:

"უნამუსობა გააკეთა, იმიტომ რომ აგინა ვიღაცას ოჯახი. უსინდისობაა, ვიღაცამ აგინა ქართული ოცნების წევრს და აბრალებ ნაციონალურ მოძრაობას. ამის ლოგიკა ხო უნდა იყოს".

მარნეულის მაცხოვრებლის ცემის საქმეზე სისხლის სამართლებრივი დევნა დღეს 13 ივნისს დაიწყო პარტია ერთიანი ნაციონალური მოძრაობის დეპუტატის, აზერ სულეიმანოვის მიმართ. მოქალაქის ცემის ბრალდებით დევნა დაიწყო ასევე მარნეულის მუნიციპალიტეტის საკრებულოს წევრის, პარტია ქართული ოცნებიდან - რამინ ალახვერდიევის და მარნეულის მერის ნათესავის, მოქალაქე ე.გ-ს მიმართ.

პროკურატურის განმარტებით, რომ 2018 წლის 10 ივნისს, ელჩინ ალახვერდიევი თბილისში, საპროტესტო აქციის დროს მარნეულის მერზე, თემურ აბაზოვზე განაწყენებულმა, ფეისბუქის პირდაპირ ვიდეოჩართვაში აბაზოვის მეუღლეს მიაყენა სიტყვიერი შეურაცხყოფა.

"იმავე დღეს, ღამის საათებში, მას დაუკავშირდა ერთიანი ნაციონალური მოძრაობის წევრი რაგიმ ასკეროვი, რომელმაც მარნეულში, პარტიის ოფისთან შეხვედრა სთხოვა. უწყების განმარტებით, ოფისში იყვნენ პარლამენტის წევრი ერთიანი ნაციონალური მოძრაობიდან აზერ სულეიმანოვი, მარნეულის საკრებულოს წევრი პარტია ქართული ოცნებიდან რამინ ალახვერდიევი, მარნეულის მუნიციპალიტეტის მერის ნათესავი ე.გ და სხვა პირები", - ნათქვამია საგამოძიებო ორგანოს განცხადებაში.

პროკურატურა განმარტავს, რომ სულეიმანოვმა დაზარალებულს მოსთხოვა აეხსნა, ფეისბუქზე პირდაპირ ეთერში ვისი დავალებით ჩაერთო, რის შემდეგაც მან და ალახვერდიევმა და მოქალაქე ე.გ-მ დაზარალებულს მიაყენეს ფიზიკური შეურაცხყოფა.

უწყების ინფორმაციით, საკრებულოს წევრებმა ჯეიხუნ ჩოიდაროვმა და რამინ ალახვერდიევმა დაზარალებული ერთ-ერთ რესტორანთან მიიყვანეს, სადაც მათ ელოდებოდა მარნეულის მერი თემურ აბაზოვი:

"მისვლისთანავე თემურ აბაზოვმა ელჩინ ალახვერდიევს შეაფურთხა სახეში და მიაყენა ფიზიკური შეურაცხყოფა, შემდეგ აიძულა ჩართულიყო ფეისბუქის პირდაპირ ეთერში, მოეხადა ბოდიში და სიტყვიერი შეურაცხყოფა მიეყენებინა საკუთარი ცოლისთვის. ბოლოს კი მარნეულის მუნიციპალიტეტის მერმა თემურ აბაზოვმა ძალადობით, ღირსების შელახვის მუქარით, ელჩინ ალახვერდიევი აიძულა მოეშარდა ჭიქაში და შარდით მოებანა სახე".