საქართველოს სახალხო დამცველის სისხლის სამართლის მართლმსაჯულების დეპარტამენტის უფროსის მოადგილის გვანცა ჩხაიძის განცხადებით, ვიდეოში, სადაც პატიმარს დნმ-ს იძულებით უღებენ, სავარაუდო ძალის გადამეტება და კანონის დარღვევა არ იკვეთება.

გვანცა ჩხაიძის განმარტებით, კანონის მიხედვით, გაწერილია დნმ-ის აღების პროცედურა. მისი თქმით, ნიმუშის აღება დასაშვებია პირის ნებართვით. თუ პირი არ არის თანახმა და დნმ-ის აღება არ იწვევს ტკივილს, შესაძლებელია მხარემ სასამართლოს მიმართოს და განჩინების საფუძველზე დნმ ძალის გამოყენებით აიღოს.

"ამ შემთხვევაში კანონის დათქმა არის ერთადერთი, რომ დნმ-ის აღება ძლიერ ტკივილს არ უნდა იწვევდეს", - განმარტავს გვანცა ჩხაიძე.

მისი თქმით გავრცელებული ვიდეოდან და შსს-ს განმარტებიდან გამომდინარე შეუძლებელია, ცალსახა კომენტარის გაკეთება, რომ პროცედურა იწვევდა ტკივილს.

სახალხო დამცველის წარმომადგენლის ცნობით, ამ ფაქტთან დაკავშირებით ცხელ ხაზზე შეტყობინება შემოვიდა, ომბუდსმენის წარმომადგენლებმა უკვე მოინახულეს ბრალდებული და საქმის შესწავლაც შეტყობინების საფუძველზე დაწყებულია.

გვანცა ჩხაიძის თქმით, თუ პირი მიმართავს სახალხო დამცველს, რომ ძალის შესაძლო ძალის გადამეტებას ჰქონდა ადგილი, ომბუდსმენი მზად არის, რომ შეისწავლოს. ამ ეტაპზე კი სახალხო დამცველი საქმის შესწავლას არ აპირებს.

შინაგან საქმეთა სამინისტროში ადასტურებენ, რომ ყაჩაღობაში ბრალდებული პირის დნმ (ოფლი და ნერწყვი) პირის იძულებით აიღეს. ტელეკომპანია TV 12-ის მიერ გავრცელებულ ვიდეოჩანაწერზე შინაგან საქმეთა სამინისტროში ბრიფინგი გაიმართა.