გასული წლის ყველაზე დიდი სკანდალის მთავარი ანტიგმირის, ჰარვი ვაინშტაინის ცოლი ჯორჯიანა ჩეპმენი, ხანგრძლივი პაუზის შემდეგ დუმილს არღვევს და ჰარვისთან დაშორების შემდგომ ცხოვრებაზე საუბრობს.

ჯორჯიანა ერთ-ერთი პირველი იყო, ვინც ვაინშტაინის საქმის გახმაურების შემდეგ მსხვერპლ ქალებს სრული მხარდაჭერა გამოუცხადა, გარდა ამისა, მან იმავე დღეს განქორწინებაზე შეიტანა საბუთები.

"წარმოუდგენლად მტკივნეული იყო ეს ყველაფერი. მე მქონდა, უფრო სწორად მე ვფიქრობდი რომ მქონდა ბედნიერი ქორწინება, მიყვარდა ჩემი ცხოვრება, თუმცა ამის მიღმა უამრავი ქალის ტკივილი იმალებოდა", - ყვება Vogue-სთან საუბარში ჩეპმენი.

ჩეპმენის თქმით, მას მკურნალობაც დასჭირდა ამ საშინელი ამბების შემდეგ.

"ვმკურნალობდი, ჩემთვის საშინელება იყო ის, რაც ხდებოდა. შოკი მქონდა, არ დამიმსახურებია ასეთი ტრაგედია, არც ერთ ქალს არ დაუმსახურებია ასეთი საშინელება. მალევე მივხვდი, რომ სიტუაცია არ უნდა მიმეშვა და მყარად დავმდგარიყავი ფეხზე. მქონდა ბრაზის, დაბნეულობის, ტირილის მომენტები. ვღელავ, ძალიან ვღელავ და მეშინია ჩემი შვილების მომავლის. მათ უყვართ მამა, ისინი გიჟდებიან ჰარვიზე და რა მოხდება როცა ამ ყველაფერს გაიგებენ? რას ეტყვის მათ ხალხი? ამაზე ფიქრი არ მასვენებს, ეს ჩემი კოშმარია. მე დამსხვრეული, განადგურებული ვიყავი, მაგრამ ჩემი და ბავშვების ბედნიერებისთვის უნდა ვიბრძოლო". - ამბობს ინტერვიუში ჩეპმენი.

ჰარვი ვაინშტაინი ათწლეულების განმავლობაში ჰოლივუდის გავლენიანი პროდიუსერი იყო, თუმცა მისი კარიერა იმ ქალებმა დაასრულეს, რომლებზეც ის წლების განმავლობაში ძალადობდა.