თბილისის მერიის წინ, კამპანია “SOS იპოდრომისა” და ორგანიზაცია “იარე ფეხით” აქტივისტებმა იპოდრომთან ესტაკადის მშენებლობა გააპროტესტეს.

აქციის მონაწილეები ამბობენ, რომ მათი პროტესტის მიზეზი ცინცაძე-კარტოზიას ქუჩების კვეთაზე ორდონიანი სატრანსპორტო კვანძის მშენებლობასთან დაკავშირებით თბილისის მერის კახა კალაძის განცხადება გახდა.

"ჩვენ გვაქვს მყარი საფუძველი ვთქვათ, რომ მერიის ამ გადაწყვეტილების მიღმა არ დგას არც ერთი დასაბუთებული კვლევა", - ნათქვამია აქციის ორგანიზატორების მიერ გავრცელებულ განცხადებაში.

პროტესტის ერთ-ერთი მხარდამჭერის, უფლებადამცველ ჯოზეფ ალექსანდერ სმიტის თქმით, ერთ თვეზე მეტია ამ პროექტს ებრძვიან.

"რატომ უნდა გაგრძელდეს უვარგისი პროექტი, რომელსაც თან ახლავს სამეცნიერო კვლევა, თუ რატომ არის საჭირო", - თქვა ჯოზეფ ალექსანდერ სმიტმა.

მისი თქმით, 13 მარტს მერიაში წერილი შეიტანეს, სადაც ესტაკადის აშენების მიზანშეუწონლობა იყო დასაბუთებული, თუმცა ამ დრომდე მერიიდან პასუხი არ მიუღიათ.

"ხელშეკრულების გაფორმების შემდეგ კი ესტაკადის მშენებლობის წინააღმდეგ 2235 ხელმოწერა შევიტანეთ", - განმარტა ჯოზეფ ალექსანდერ სმიტმა.

აქციის ორგანიზატორების განცხადებით, პროექტის განხორციელების შემთხვევაში იპოდრომის ტერიტორია ცინცაძე-კარტოზიას ქუჩების მხრიდან მიუვალი გახდება.

"ერთადერთი, ვისაც ეს პროექტი ემსახურება არიან მძღოლები და ავტომობილების ინტერესები. ის არ არის ადამიანის ინტერესებზე მორგებული", - განაცხადეს აქციის მონაწილეებმა.

მათი პოზიციით, თუ იპოდრომის მიმდებარე ტერიტორიაზე ესტაკადა აშენდება, ისინი პროტესტს გააგრძელებენ, ესტაკადას დაანგრევენ და პოლიტიკურ პასუხისმგებლობას თბილისის მერს დააკისრებენ.

თბილისში, ძველ იპოდრომთან, ცინცაძე-კარტოზიას ქუჩების კვეთაზე ესტაკადა შენდება.

ტენდერი უკვე გამოცხადდა, შესყიდვის სავარაუდო ღირებულება 2 901 669 ლარია.