ამერიკელ რეპერს კანიე ვესტს ჰოლივუდ რეპორტერი ხელოვნებაზე, ეგოსა და მოდაზე ესაუბრა. ინტერვიუში ვესტმა აღნიშნა, რომ წიგნს წერს:

"ახალი კონცეფცია მაქვს, რაშიც ვცდილობ გავერკვე. ფილოსოფიურ წიგნს ვწერ, რომელსაც Break the Simulation [სიმულაციის გარღვევა] ერქმევა. მაქვს იდეა ფოტოებზე, ადამიანებზე, რომლებიც ფოტოგრაფიაზე გიჟდებიან, რადგან ამას აწმყოდან გამოჰყავხარ და წარსულსა და მომავალში გამოგზაურებს. ეს შეიძლება იყოს ბიოგრაფიული დოკუმენტაციისთვის გამოყენებული, მაგრამ, ხშირად ადამიანებს გავლენის ქვეშ აქცევს".

კანიემ თავის მოდის ხაზზე, Yeezy-ზეც, ისაუბრა:

"ჩვენ ვქმნით ბოტასებს, რომლებიც უსწრაფესად იყიდება და ვფიქრობთ 'ოჰ, ეს ის რიცხვია, რომელსაც ქალები ყოველდღიურად ხმარობენ'. და არ მინდა, რომ სულ პირველი ვიყო, მინდა წყალი გავხდე. მინდა უფრო ახლოს ვიყო იუნისეფთან, ან რამე მსგავსთან, საიდანაც ინფორმაციას ავიღებ და მაქსიმალურად ბევრ ადამიანს დავეხმარები. ამ ყველაფრის ერთ ბრენდში მოთავსება აღარ მინდა".

ამ ინტერვიუდან ცოტა ხნის შემდეგ, კანიემ თქვა, რომ მისი წიგნი ტვიტერზე იწერება - რაც იმას ნიშნავს, რომ 11-თვიანი გაუჩინარების შემდეგ, ინტერნეტში დაბრუნებული რეპერის ყველა ტვიტი მისი ახალი ფილოსოფიური წიგნის ნაწილია.

"ჩემს ახალ წიგნს რეალურ დროში ვწერ, ვერცერთი გამომცემელი მეტყვის, რა სად ჩავსვა და რამდენი გვერდი უნდა დავწერო. ეს ფინანსური სარგებლის გამო არ ხდება, ეს არის გამოხატვის ბუნებრივი სურვილი. ამ 'წიგნზე' მაშინ ვიმუშავებ, როცა მენდომება".