"მე პრეზიდენტ პუტინს დავურეკე და არჩევნებში გამარჯვება მივულოცე", - ამის შესახებ აშშ-ს პრეზიდენტმა, დონალდ ტრამპმა ტვიტერის საკუთარ გვერდზე დაწერა, სადაც ახსნა ის მიზეზები, თუ რატომ მიულოცა ვლადიმერ პუტინს:

"წარსულში ობამამაც დაურეკა მას. "ყალბი მედია" გაგიჟდა. მათ სურდათ მე ის გამეკრიტიკებინა. ისინი ცდებიან. რუსეთთან და სხვებთანაც ურთიერთობის დალაგება კარგია, ცუდი არ არის. მათ შეუძლიათ გადაჭრან პრობლემები ჩრდილოეთ კორეასთან, სირიასთან, უკრაინასთან, ისლამურ სახელმწიფოსთან, ირანთან. ბუშმა სცადა ურთიერთობის დალაგება მაგრამ ჭკვიანი ხალხი არ ჰყავდა ირგვლივ. ობამამ და კლინტონმაც სცადეს, მაგრამ ენერგია ან ქიმია არ ჰქონიათ. გაიხსენეთ გადატვირთვის პოლიტიკა. მშვიდობა სიძლიერით".

დონალდ ტრამპისა და ვლადიმერ პუტინის სატელეფონო საუბრის შესახებ კრემლის პრესსამსახურმა გაავრცელა განცხადება.

სენატორმა ჯონ მაკკეინმა ტრამპი მილოცვის გამო გააკრიტიკა და თქვა, რომ ამერიკელი პრეზიდენტი, არ უნდა მართავდეს თავისუფალ სამყაროს, დიქტატორებისთვის სამარცხვინო არჩევნებში გამარჯვების მილოცვით:

"ამით პრეზიდენტი ტრამპი შეურაცხყოფას აყენებს რუსეთის ყველა მოქალაქეს, რომელთა უფლება, მონაწილეობა მიეღოთ თავისუფალ და სამართლიან არჩევნებში, უგულებელყვეს".

რუსეთის საპრეზიდენტო არჩევნების შედეგების გამოცხადების შემდეგ, პრეზიდენტის პრესმდივანმა, ჰოგან გიდლიმ ჟურნალისტებს განუცხადა, რომ პუტინის გამარჯვება ვაშინგტონისთვის სიურპრიზი არ ყოფილა და ამიტომ კრემლში სატელეფონო საუბარი დაგეგმილი არ იყო.

პუტინის გამარჯვება პირველად მიულოცეს ჩინეთის სახალხო რესპუბლიკის, აზერბაიჯანის, ბელორუსის, სომხეთის, უნგრეთის, უზბეკეთის, ვენესუელას, თურქმენეთის, ყაზახეთის, ტაჯიკეთის, კუბის, მოლდოვასა და ყირგიზეთის ლიდერებმა. ასევე, მისალოცი წერილები გააგზავნეს დე ფაქტო სამხრეთ ოსეთისა და აფხაზეთის რესპუბლიკების პრეზიდენტებმა.

დონალდ ტრამპისგან განსხვავებით, კრემლში დარეკა საფრანგეთის პრეზიდენტმა, ემანუელ მაკრონმა. თუმცა, როგორც ფრანგული პრესა წერს, მაკრონს გამარჯვება არ მიულოცავს, არამედ ქვეყნის მოდერნიზებაში წარმატება უსურვა.

გერმანიის კანცლერმა, ანგელა მერკელმა ორშაბათს, 19 მარტს, ვლადიმერ პუტინს წერილი გაუგზავნა, რომელშიც მას გამარჯვება მიულოცა და აღნიშნა, რომ ქვეყნებს შორის დიალოგი უნდა გაგრძელდეს.