თბილისის განვითარების ფონდი თბილისში გუდიაშვილის მოედნისა და მიმდებარე არეალის სარეაბილიტაციო სამუშაოების შესრულებას ტენდერის გარეშე გეგმავს. მომსახურების საერთო ღირებულება 50 მილიონი ლარია. თბილისის მერიის დაქვემდებარებული ფონდი ახლა პასუხს შესყიდვების სააგენტოსგან ელოდება.

თბილისის განვითარების ფონდის განმარტებით, ამ მომსახურებაზე ტენდერი წინასწარ ვერ გამოცხადდებოდა, რადგან:

  • პროექტის პროცესში დადგინდა, რომ სარეაბილიტაციო ადგილზე არსებული კულტურული მემკვიდრეობის ძეგლები ავარიულია, შენობებსა და ეზოებში კი საკომუნიკაციო ქსელი მოძველებული;
  • დროებითი დამონტაჟებული გამაგრების კონსტრუქციები განიცდის დეფორმაციას შენობების ავარიულობის ხარისხის მატების გამო და დროული სარეაბილიტაციო სამუშაოებია საჭირო;
  • რეაბილიტაციის დროს საავტომობილო-საკომუნიკაციო გზები დიდი დროის განმავლობაში გადაიკეტება, რის გამოც შეფერხდება საფეხმავლო და საავტომობილო მოძრაობა;
  • დედაქალაქის ცენტრალურ ნაწილში ეკონომიკური აქტივობის შეფერხდება და ტურისტების ნაკადი შემცირდება.

ფონდი სააგენტოსგან მიღებული თანხმობის შემთხვევაში, მუშაობის დამთავრებას 2019 წლის 31 დეკემბრამდე გეგმავს. ამ დროის განმავლობაში იგეგმება:

  • 30-ზე მეტ მისამართზე განთავსებული ინდივიდუალური შენობა-ნაგებობების რეკონსტრუქცია-რესტავრაცია-რეაბილიტაცია;
  • რეაბილიტაციის დროს, მომიჯნავე ავარიულ შენობებზე მოულოდნელი დაზიანებების განვითარების ან/და დაზიანებების აღმოფხვრისთვის საჭირო კვლევა-პროექტირება;
  • მოედნისა და მიმდებარე არეალის შენობების ეზოების საინჟინრო-საკომუნიკაციო ქსელების რეკონსტრუქცია;
  • მოედნისა და მიმდებარე არეალის კეთილმოწყობა.