თბილისის მერიის კეთილმოწყობისა და არქიტექტურის სამსახურის ორი თანამშრომელი გათავისუფლებულია. მერის განმარტებით, აღნიშნული გადაწყვეტილების მიზეზი პირების მიერ ინტერესთა შეუთავსებლობის წესის დარღვევა - კერძოდ კი, ოჯახის წევრებთან დაკავშირებული საქმისწარმოებაში მიკერძოებული გადაწყვეტილებები გახდა. ამის შესახებ კალაძემ დედაქალაქის მთავრობის დღევანდელ სხდომაზე განაცხადა.

კალაძის თქმით, მერიის შიდა აუდიტის სამსახურმა რამდენიმე მიმართულებით დაიწყო მოკვლევა, რა დროსაც კონკრეტული დარღვევები გამოიკვეთა. მისივე თქმით, მსგავსი ფაქტები, ცუდად აისახება თბილისის მერიის იმიჯზე, მერიის თანამშრომლების მუშაობის ხარისხზე და დედაქალაქის მერიას მხოლოდ პროფესიონალი, კეთილსინდისიერი ადამიანები სჭირდება.