თბილისის მერმა, კახა კალაძემ მერიის თანამშრომლებს სთხოვა, რომ პარკირების სპეციალური საშვები ოჯახის წევრებს არ გადასცენ. ამის შესახებ მან მთავრობის დღევანდელ სხდომაზე განაცხადა.

მისი თქმით, პარკირების სპეციალური საშვები მხოლოდ და მხოლოდ ოპერატიული დანიშნულების ავტომანქანებისთვისაა განკუთვნილი:

"სამწუხაროდ, ბოლო პერიოდში, პარკირების სპეციალური საშვებით არასამსახურებრივი საჭიროებისთვის სარგებლობასთან დაკავშირებით, ცალკეული შემთხვევები დაფიქსირდა".

დედაქალაქის მერი მიიჩნევს, რომ მოადგილეები და საქალაქო სამსახურების უფროსები სხვებისთვის სამაგალითო უნდა იყვნენ.

"ჩვენ არ გვჭირდება პრივილეგირებული ჩინოვნიკები, ჩვენ ვემსახურებით ხალხს, ქალაქს და რიგითი მოქალაქეებისგან არაფრით განვსხვავდებით. ამიტომ, ჩემი თხოვნა იქნება, მოადგილეებსაც ეხება ეს, სამსახურის უფროსებს და ყველა ჩვენს თანამშრომელს, ჩვენ უნდა ვიყოთ სამაგალითო", - აღნიშნა კახა კალაძემ.