14 წლის არასრულწლოვნის გაუპატიურებისთვის სასამართლომ დამნაშავეს 18-წლიანი პატიმრობა მიუსაჯა. გადაწყვეტილების შესახებ ინფორმაციას თბილისის საქალაქო სასამართლო ავრცელებს.

სასამართლოს ინფორმაციით, მოძალადემ არასრულწლოვნის ნების საწინააღმდეგოდ, სიცოცხლის მოსპობის მუქარით სქესობრივი კავშირი დაამყარა.

"აღნიშნულის შემდეგ, გააფრთხილა არავისთვის ეთქვა მომხდარის შესახებ, წინააღმდეგ შემთხვევაში დაემუქრა, რომ მსგავს ქმედებას მისი დის მიმართაც განახორციელებდა. ძალადობის მუქარითა და ძალის გამოყენებით, აღნიშნული ქმედება იანვრის თვის განმავლობაში ბრალდებულმა სამჯერ განახორციელა", - აცხადებენ სასამართლოში.

უწყების ინფორმაციით, არსებითი განხილვის დროს ბრალდებულმა, თავი არ სცნო დამნაშავედ და არ დაეთანხმა წარდგენილ ბრალდებას. თუმცა, მას განაჩენი სისხლის სამართლის კოდექსის, 137-ე მუხლის მე-4 ნაწილის "გ" ქვეპუნქტით, გაუპატიურებით მიესაჯა.