უცხოური საგარეო უწყებები საქართველოს დამოუკიდებლობის დღეს ულოცავენ. რუმინეთის საგარეო საქმეთა სამინისტრო სოციალურ ქსელში წერს, რომ მტკიცედ უჭერს მხარს საქართველოს დამოუკიდებლობას, სუვერენიტეტსა და ტერიტორიულ მთლიანობას.

"გილოცავთ დამოუკიდებლობის დღეს, საქართველო! რუმინეთი მტკიცედ უჭერს მხარს საქართველოს დამოუკიდებლობას, სუვერენიტეტსა და ტერიტორიულ მთლიანობას, ისევე როგორც ქართველი ხალხის ევროპულ მისწრაფებებს.

ჩვენმა ქვეყნებმა უფრო მჭიდროდ უნდა ითანამშრომლონ შავი ზღვის რეგიონში დაკავშირებადობის გასავითარებლად, განსაკუთრებით "მწვანე ენერგიის დერეფნისა" და "შავი ზღვა-კასპიის ზღვის სატრანსპორტო მარშრუტის" მეშვეობით", — წერია განცხადებაში.

საქართველოს დამოუკიდებლობის დღე მიულოცა პოლონეთის საგარეო საქმეთა სამინისტრომაც.

"გილოცავთ დამოუკიდებლობის დღეს, საქართველო!

საქართველოს დამოუკიდებლობის დღესთან დაკავშირებით, გულწრფელად გილოცავთ და საუკეთესო სურვილებს ვუგზავნით ქართველ ხალხს", — წერია განცხადებაში.

საქართველოს დამოუკიდებლობის დღესთან დაკავშირებით განცხადება გამოაქვეყნა ლატვიის საგარეო საქმეთა სამინისტრომაც. განცხადებაში ხაზგასმულია, რომ ლატვია მტკიცედ უჭერს მხარს საქართველოს დემოკრატიასა და მისი ხალხის ევროპულ მისწრაფებებს.

"საქართველოს დამოუკიდებლობის დღესთან დაკავშირებით, ლატვია გულწრფელად ულოცავს და საუკეთესო სურვილებს უგზავნის ქართველ ხალხს. ლატვია კვლავ მტკიცედ უჭერს მხარს საქართველოს დემოკრატიასა და მისი ხალხის ევროპულ მისწრაფებებს",—წერია უწყების განცხადებაში.

საქართველოს დამოუკიდებლობის დღეს ულოცავს ესტონეთის საგარეო საქმეთა სამინისტროც.უწყების განმარტებით, ისინი მხარს უჭერენ ქართველი ხალხის დემოკრატიულ ნებასა და ევროპულ მისწრაფებებს.

"ესტონეთი გულწრფელად ულოცავს ქართველ ხალხს დამოუკიდებლობის დღეს.
ჩვენ კვლავ ერთგულნი ვრჩებით, მხარი დავუჭიროთ ქართველი ხალხის დემოკრატიულ ნებასა და ევროპულ მისწრაფებებს", — აღნიშნულია განცხადებაში.

ცნობისთვის, დღეს, საქართველო სახელმწიფოებრივი დამოუკიდებლობის აღდგენის 108-ე წლისთავს ზეიმობს. 1918 წლის 26 მაისს, ეროვნული საბჭოს სხდომამ ისტორიული მნიშვნელობის დოკუმენტი — "საქართველოს დამოუკიდებლობის აქტი" დაამტკიცა. სწორედ აღნიშნული გადაწყვეტილებით გამოცხადდა ქვეყნის სუვერენიტეტი და საფუძველი ჩაეყარა საქართველოს პირველ დემოკრატიულ რესპუბლიკას.