"თბილისიმარათონი 2017" კვლავ დაგეგმილ ადგილას, 22 ოქტომბერს გაიმართება. როგორც თბილისის მერიაში აცხადებენ, შეცვლილია მხოლოდ დაწყებისა და დასრულების დრო.

მერიის ინფორმაციით, მარათონი დილის 9 საათის ნაცვლად 8:30-ზე დაიწყება და 14 საათის ნაცვლად, 11:00 საათზე დასრულდება. უწყებაში ფიქრობენ, რომ ასე დედაქალაქის ქუჩების პარალიზებისა და მოქალაქეებისთვის დისკომფორტის შექმნის თავიდან აცილებას შეძლებენ.

"თბილისის მერიამ აღნიშნული გადაწყვეტილების მიღებისას, როგორც მარათონის მონაწილეების, ასევე, მოქალაქეების ინტერესები გაითვალისწინა", - ამბობენ მერიაში.

თბილისიმარათონის ორგანიზატორებმა ღონისძიების გაუქმების შესახებ ინფორმაცია 16 ოქტომბერს გაავრცელეს და გადაწყვეტილება თბილისის მერიას დაუკავშირეს.

მათი განცხადებით, თბილისის მერიისგან შეიტყვეს, რომ თბილისის ქუჩებში არსებული სარემონტო სამუშაოების გამო ცენტრალური ქუჩების გადაკეტვა თბილისიმარათონისთვის გამოიწვევს სატრანსპორტო მოძრაობის პარალიზებას და თბილისელების გულის წყვეტას. მათივე განმარტებით, მერიამ მათ შესთავაზა გარბენი დაწყებულიყო დილით 7 საათზე ან მომხდარიყო ღონისძიების ლოკაციის შეცვლა.