ცოტა ხნის წინ, ევროპარლამენტში საქართველოს შესახებ ანგარიში წარადგინეს, სადაც 2025 წელს საქართველოში განვითარებული მოვლენებია განხილული. დოკუმენტი საქართველოზე მუდმივმა მომხსენებელმა ლიეტუველმა ევროპარლამენტარმა რასა იუკნევიჩიენემ წარადგინა.

დოკუმენტში ვკითხულობთ, რომ "ანგარიში მხარს უჭერს "ქართული ოცნების" ხელმძღვანელობისა და ძირითადი თანამდებობის პირების წინააღმდეგ ევროკავშირისა და წევრი სახელმწიფოების მიზანმიმართულ სანქციებს, მიესალმება ეუთოს მოსკოვის მექანიზმის გააქტიურებას, რათა შეაფასოს საქართველოს დემოკრატიული ვალდებულებების შესრულება და აღნიშნავს ევროკავშირის მიერ ქართული დიპლომატიური და ოფიციალური პასპორტების მფლობელებისთვის უვიზო მიმოსვლის შეჩერებას".

ამას გარდა, ანგარიშში ხაზგასმულია ისიც, რომ მიზნობრივი პერსონალური სანქციები უნდა დაწესდეს ბიძინა ივანიშვილის, ქართული ოცნების ლიდერების, მოსამართლეების, პროკურორების და სხვა თანამდებობის პირების მიმართ, რომლებიც პასუხისმგებელნი არიან საქართველოში დემოკრატიული უკუქცევის, არჩევნების გაყალბების, ადამიანის უფლებების დარღვევების და პოლიტიკური ოპონენტებისა და აქტივისტების დევნაზე, დაუსჯელობის წინააღმდეგ მნიშვნელოვან ინსტრუმენტს წარმოადგენს.

"ეს არის მეორე ანგარიში საქართველოს შესახებ, როგორც ევროკავშირის კანდიდატი ქვეყნის შესახებ, რომელიც ითვალისწინებს 2025 წლის კომისიის ანგარიშს საქართველოს შესახებ. ანგარიში ფოკუსირებულია ევროპარლამენტის მთავარ შეშფოთებაზე, რომელიც ეხება საქართველოს დემოკრატიის მდგომარეობას, კანონის უზენაესობას და ევროპულ ინტეგრაციას.

ანგარიში ასახავს იმ ფაქტს, რომ საქართველოში დემოკრატიული უკუსვლა კიდევ უფრო გაძლიერდა, წინა ანგარიშის შემდეგ. ყველა 9 პრიორიტეტის განხორციელებაში უკუსვლა შეინიშნება, რაც საქართველოსთვის კანდიდატის სტატუსის მინიჭების პირობა იყო. მმართველი პარტია ქართული ოცნება აგრძელებს თავის ორკესტრირებულ და სისტემატურ კამპანიას ევროკავშირის, მისი თანამდებობის პირებისა და დიპლომატების წინააღმდეგ, მანიპულაციური ნარატივების, დეზინფორმაციისა და შეთქმულების თეორიების გამოყენებით. პოლიტიკური ოპონენტები დააპატიმრეს ან მუქარისა და ფიზიკური თავდასხმების წინაშე დგანან. საქართველოს სამოქალაქო საზოგადოებისა და დამოუკიდებელი მედიის საქმიანობა იხშობა სულ უფრო რეპრესიული კანონმდებლობით, განსაკუთრებით, გრანტების შესახებ კანონში შეტანილი უახლესი ცვლილებებით, რომლებიც კრიმინალიზაციას უწევს უცხოური დაფინანსების მიღებას, მთავრობის წინასწარი თანხმობის გარეშე.

ასობით სამოქალაქო საზოგადოების აქტივისტი გახდა ფიზიკური ძალადობისა და დაშინების მსხვერპლი, ხოლო ათობით დააკავეს და დააპატიმრეს პოლიტიკური ნიშნით. ანგარიში მხარს უჭერს ქართული ოცნების ხელმძღვანელობისა და ძირითადი თანამდებობის პირების წინააღმდეგ ევროკავშირისა და წევრი სახელმწიფოების მიზანმიმართულ სანქციებს, მიესალმება ეუთოს მოსკოვის მექანიზმის გააქტიურებას, რათა შეაფასოს საქართველოს დემოკრატიული ვალდებულებების შესრულება და აღნიშნავს ევროკავშირის მიერ ქართული დიპლომატიური და ოფიციალური პასპორტების მფლობელებისთვის უვიზო მიმოსვლის შეჩერებას.

ევროკავშირის სახელით უმაღლესი წარმომადგენლის მიერ გაკეთებული განცხადებებისა და სანქციებთან დაკავშირებით საბჭოს გადაწყვეტილებებისადმი თანხვედრის შემცირება და ჩინეთთან, რუსეთთან და ირანთან თანამშრომლობის გაძლიერება კიდევ უფრო ადასტურებს საქართველოს ევროატლანტიკური ინტეგრაციის გზიდან გადახვევას.

ამ ნეგატიურ გარემოში, უფრო მნიშვნელოვანია, ვიდრე ოდესმე, მხარი დავუჭიროთ ქართველ ხალხს, რომელიც აგრძელებს ბრძოლას ევროპული და დემოკრატიული საქართველოსთვის", — წერია დოკუმენტში.

ევროპარლამენტის საგარეო საქმეთა კომიტეტის თავმჯდომარის, დევიდ მაკალისტერის თქმით, ევროპარლამენტის საგარეო საქმეთა კომიტეტში საქართველოს შესახებ ანგარიშის კენჭისყრა 4 ან 5 მაისს გაიმართება.