სინდისის პატიმარმა და მსახიობმა ანდრო ჭიჭინაძემ ვასო აბაშიძის სახელობის ახალი თეატრი დატოვა. მსახიობის ციხიდან გამოგზავნილ წერილში ვკითხულობთ, რომ ის ამ გადაწყვეტილებით სოლიდარობას გამოხატავს იმ კოლოგებისადმი, რომლებმაც თეატრი პროტესტის ნიშნად დატოვეს.

"მეც ვტოვებ ვასო აბაშიძის სახელობის თეატრს!

ამ სიმბოლური ტექსტით მინდა სოლიდარობა და გვერდში დგომა გამოვხატო იმ ადამიანების მიმართ, რომლებიც თავად არიან სოლიდარობისა და მეგობრობის მაგალითი.

ძალიან არასწორ და რთულ სფეროს ებრძვით, "მეგობრებო". ისტორიას გადავხედოთ და მარტივად მივხვდებით, რომ ხელოვანები თავიანთი მოქალაქეობრივი პოზიციით იყვნენ და არიან თქვენთვის და ნებისმიერი ხელისუფლებაში მყოფისთვის ყველაზე სახიფათო ადამიანები. ასე იქნება ყოველთვის.

თქვენამდეც და თქვენ შემდეგაც სიმართლე ერთი იქნება და ამ სიმართლის სათქმელად სიტყვა ყოველთვის გამოინახება. ამიტომ ჩემი რჩევაა — სწორი ღირებულებების მქონე ადამიანებთან ბრძოლა წამგებიანია," — ვკითხულობთ მსახიობ ანდრო ჭიჭინაძის ციხიდან გამოგზავნილ წერილში, რომელსაც ადვოკატი თორნიკე მიგინეიშვილი ავრცელებს.

ანდრო ჭიჭინაძის მხარდამჭერი ბანერის ჩამოხსნის შემდეგ, 9 მსახიობმა — ნანკა კალატოზიშვილმა, კახა კინწურაშვილმა, ეკა დემეტრაძემ, გივიკო ბარათაშვილმა, ტასო ჭანტურაიამ და დავით ბეშიტაიშვილმა, მანუ თავაძემ, ლუკა ჯაფარიძემ და ირაკლი ჯაფარიძემ ვასო აბაშიძის ახალი თეატრი პროტესტის ნიშნად დატოვეს.

20 დეკემბერს, ვასო აბაშიძის ახალი თეატრის ფასადიდან მსახიობ ანდრო ჭიჭინაძის მხარდამჭერი ბანერი წარწერით "თავისუფლება სისტემის პატიმრებს" ჩამოხსნეს.