2026 წლიდან, სავარაუდოდ, სოციალურად დაუცველებისთვის გათვლილი საზოგადოებრივ სამუშაოებზე დასაქმების პროგრამა აღარ იმუშავებს — ამის შესახებ 2026 წლის სახელმწიფო ბიუჯეტის პროექტიდან ვიგებთ. ოცნების პარლამენტში წარდგენილი პროექტის მიხედვით, შრომისა და დასაქმების სისტემის რეფორმებისთვის გამყოფილი 91 მილიონი ლარი მცირდება და 21.6 მილიონი იქნება.

განმარტებით დოკუმენტში ვკითხულობთ, რომ სოციალურად დაუცველებისთვის გათვლილმა პროგრამამ ოთხწლიანი პერიოდი ამოწურა და მმართველი პარტია მიიჩნევს, რომ მისი ამ ფორმით გაგრძელების საჭიროებას ვერ ხედავენ.

"აღნიშნული პროგრამის ფარგლებში, პროექტის წინა ვერსიით გათვალისწინებული იყო
საზოგადოებრივ სამუშაოებზე დასაქმების ხელშეწყობის მიზნით შესაბამისი ასიგნებები.
აღნიშნულ ქვეპროგრამას მიმდინარე წელს შეუსრულდა 4-წლიანი ციკლი, რაც
თავდაპირველად იყო დაგეგმილი. ამავდროულად, ბოლო წლების მაღალი ეკონომიკური ზრდის პარალელურად ფიქსირდება სამუშაო ძალის დეფიციტი შრომის ბაზარზე.
შესაბამისად მიზანშეწონილად ჩაითვალა მომდევნო პერიოდში აღარ გაგრძელდეს
პროგრამა არსებული სტრუქტურით და მის ბენეფიცირებს სხვადასხვა გადამზადების
პროგრამებით ხელი შეეწყოს კერძო სექტორში დასაქმების მიმართულებით," — ვკითხულობთ განმარტებაში.

საქართველოს სახელმწიფო ბიუჯეტის პროგრამების მუხლში ვკითხულობთ, რომ სოციალურად დაუცველთა მხარდაჭერა ღია შრომის ბაზარზე დასაქმების ხელშესაწყობად გაგრძელდება. მუხლში ასევე დაკონკრეტებულია, რომ უმუშევრობის მხარდამჭერი სხვადასხვა მექანიზმიც შემუშავდება — დოკუმენტში არ არის ცვლილებების თარიღი დაკონკრეტებული.