საქართველოს ახალგაზრდა იურისტთა ასოციაციის იურისტის ირმა პავლიაშვილის თქმით, თბილისის საკრებულოს პარლამენტის დეპუტატების სხდომაზე არ შეშვების უფლება არ ჰქონდა. პავლიაშვილმა On.ge-ს უთხრა, რომ თუ სხდომა იხურება, ის უნდა დაიხუროს ყველასთვის:

"თუ უსაფრთხოების ზომებს ვაძლიერებ, უნდა უზრუნველვყო, რომ ადამიანები სხდომაზე შევიდნენ და დაესწრონ. თუ დავინახავ, რომ ვინმე პროვოცირებას მიმართავს, ეფექტური მოქმედება უნდა განვახორციელო, რომ სხდომის მიმდინარეობა არ დაირღვეს".

მისი თქმით, კანონმდებლობით სხდომა საჯაროა და ნებისმიერ პირს აქვს დასწრების უფლება, გარდა კანონით გათვალისწინებული შემთხვევებისა:

"მაგალითად, თუ ესაა პერსონალური ინფორმაციის, სახელმწიფო და კომერციული საიდუმლოს დაცვის, მაგრამ ამ შემთხვევაში ამას ადგილი არ აქვს".

პავლიაშვილის განმარტებით, სხდომის დახურვის შესახებ აქტი წინასწარ უნდა გამოქვეყნდეს და ეს უნდა იყოს არა ერთპიროვნული, არამედ საკრებულოს გადაწყვეტილებით მიღებული აქტი.

თბილისის საკრებულომ ივანიშვილთან დაკავშირებული კომპანიებისთვის თბილისის ცენტრში მიწების ერთ ლარად გადაცემის საკითხს მხარი დაუჭირა.

საკრებულოს თავმდჯომარემ, გიორგი ალიბეგაშვილმა განაცხადა, რომ საკრებულოს დღევანდელ სხდომაზე დასწრების უფლება მხოლოდ საკრებულოს წევრებსა და მედიას ჰქონდათ. ალიბეგაშვილის თქმით, ამის მიზეზია ოპოზიციის გაცხადებული მიზანი საკრებულოს სხდომის ჩაშლის შესახებ. პოლიციის თანამშრომლებმა, რომლებსაც თბილისის საკრებულოს შენობა ალყაში აქვთ, საქართველოს პარლამენტის დეპუტატები შენობაში არ შეუშვეს, რასაც დაპირისპირება მოჰყვა.

ნაციონალური მოძრაობისა და ევროპული საქართველოს წევრები საკრებულოში შესვლასა და სხდომის გაპროტესტებას აპირებდნენ.

დღეს, 10 ოქტომბერს თბილისის საკრებულო საქართველოს ყოფილი პრემიერ-მინისტრთან და მმართველი პარტიის დამფუძნებელთან, ბიძინა ივანიშვილთან დაკავშირებული ორი კომპანიისთვის მიწის გადაცემის საკითხს მხარი დაუჭირა. საუბარია ოქროყანის დასახლებაში მდებარე 4 400 მ2 მიწის ნაკვეთისა და პუშკინის ქუჩაზე, "ცეკავშირის" მიმდებარე ტერიტორიაზე არსებული 1 900 მ2 მიწის ნაკვეთზე.