პოლონეთის პრემიერმინისტრი დონალდ ტუსკი ევროპის სასამართლოს მიერ ევროკავშირის სხვა ქვეყანაში გაფორმებულ ერთსქესიანთა ქორწინების აღიარების შესახებ გადაწყვეტილებას გამოეხმაურა.

მან მთავრობის სხდომაზე განაცხადა, რომ საგარეო საქმეთა მინსიტრ რადოსლავ სიკორსკის დავაალა, მოამზადოს ინფორმაცია ერთსქესიანთა ქორწინებასთან დაკავშირებით ტრიბუნალის გადაწყვეტილების შედეგების შესახებ.

"მე საგარეო საქმეთა მინსიტრ სიკორსკის დავავალე, მოამზადოს ინფორმაცია ერთსქესიანთა ქორწინებასთან დაკავშირებით ტრიბუნალის გადაწყვეტილების შედეგების შესახებ. მარტივად რომ ვთქვათ, მოკლედ ვსაუბრობ და უკვე ბევრი თეორია და ემოცია წარმოიშვა, რაც გასაგებია. ეს საკითხი ასევე იწვევს დიდ განხეთქილებას საზოგადოებრივ აზრში და არა მხოლოდ პოლონეთში. ამიტომ, მინდა ყველა დაგამშვიდოთ", — განაცხადა პრემიერმინისტრმა დონალდ ტუსკმა მთავრობის სხდომაზე.

მისი თქმით, პოლონეთი ბრიუსელის მხრიდან არანაირ იძულებას არ განიცდის.

"საქმე იმაში არ არის, რომ ევროკავშირს შეუძლია რამე დაგვაძალოს ამ საკითხზე. როგორც იცით, ჩვენ ვმუშაობთ ჩვენს საკანონმდებლო დებულებებზე, რომლებიც ამ საკითხს ისე დაარეგულირებს, როგორც პოლონელების უმრავლესობა, საპარლამენტო უმრავლესობის მეშვეობით, მიზანშეწონილად მიიჩნევს", — თქვა დონალდ ტუსკმა.

ევროკავშირის სასამართლოს გადაწყვეტილება

სამშაბათს, ევროპის სასამართლომ (ECJ) დაადგინა, რომ წევრი სახელმწიფო ვალდებულია აღიაროს ერთსქესიანი წყვილის ქორწინება, თუ ის კანონიერად დაიდო ევროკავშირის სხვა ქვეყანაში. ეს დებულება ასევე ვრცელდება იმ ქვეყნებზე, სადაც ასეთი კავშირები არ არის გათვალისწინებული ეროვნული კანონმდებლობით. თუმცა, ეს გადაწყვეტილება არ მოითხოვს ერთსქესიანთა ქორწინების ეროვნულ კანონმდებლობაში შეტანას, არამედ მხოლოდ მოითხოვს ადრე დადებული კავშირის სამართლებრივი შედეგების პატივისცემას.

ცნობისათვის, სასამართლომ გადაწყვეტილება გამოიტანა წყვილთან დაკავშირებით, რომელთა ქორწინებაც გერმანიაში გაფორმდა და პოლონეთმა მის აღიარებაზე უარი თქვა.