თბილისის საკრებულოს თავმჯდომარის გიორგი ალიბეგაშვილის განცხადებით, საკრებულოს დღევანდელ სხდომას, სადაც ბიძინა ივანიშვილთან დაკავშირებული კომპანიებისთვის მიწების გადაცემის საკითხს კენჭი უნდა უყარონ, მხოლოდ საკრებულოს წევრები და მედია დაესწრება.

საკრებულოს შენობასთან მობილიზებულია საპატრულო პოლიცია. საკრებულოს შენობაში შესვლა შესაძლებელია მხოლოდ ცენტრალური კარიდან. ალიბეგაშვილის განცხადებით, პარლამენტის დეპუტატებმა არაერთხელ გააჟღერეს, რომ "საკრებულოს სხდომის ჩაშლას აპირებდნენ":

"კანონის დარღვევის საშუალებას არავის მივცემთ. რეგლამენტი უნდა განხორციელდეს და ჟურნალისტებს მოგმართავთ, რომ, როდესაც დაესწრებით სხდომას და განხილული იქნება პროექტები, ჩვენი თხოვნა იქნება, რომ ჩვენს მოსახლეობას სწორი ინფორმაცია მიაწოდოთ".

საკრებულოს შენობასთან 14:00 საათზე დაგეგმილია ერთიანი ნაციონალური მოძრაობის საპროტესტო აქცია:

"ის, რაც დღეს ხდება საკრებულოს შენობასთან არის ამ ხელისუფლების სირცხვილი. ჩემი ინფორმაციით, საკრებულოს ეზოში სპეცდანიშნულების რაზმია მობილიზებული, მიმდებარე ტერიტორიაზეც სპეცდანიშნულების რაზმია მობილიზებული. ასე უნდათ ქალაქის პრობლემების მოგვარება?" - განაცხადა ნაციონალური მოძრაობის თბილისის მერობის კანდიდატმა, ზალიკო უდუმაშვილმა.

ევროპული საქართველოს თბილისის მერობის კანდიდატის, ელენე ხოშტარიას განცხადებით გიორგი ალიბეგაშვილის კანონს არღვევს, რადგან პარლამენტის რეგლამენტის მიხედვით, პარლამენტის წევრებს, სათათბირო ხმის უფლებით, საკრებულოს სხდომაზე დასწრების უფლება აქვთ:

"ქართული ოცნება არის ძალიან დასუსტებული. ქართული ოცნება მიდის კანონის წინააღმდეგ და გადაწყვეტილება, რომელიც მათ უნდა მიიღონ არ შეუძლიათ, რომ მიიღონ ისე, როგორც შეეფერება საკრებულოს".

29 სექტემბერს, თბილისის საკრებულომ პუშკინის სკვერთან ფუნქციური სტატუსის და თაბორის მთის ლანდშაფტური ზონის სტატუსის შეცვლას მხარი დაუჭირა.

გავრცელებული ინფორმაციით, რომ პუშკინის სკვერის მიმდებარე ტერიტორიაზე პანორამა თბილისის სასტუმროს პარკინგი უნდა აშენდეს, თაბორის მთაზე კი პანორამა თბილისის გოლფის მოედნის სარწყავი უნდა მოეწყოს. პანორამა თბილისი საქართველოს ყოფილი პრემიერ-მინისტრისა და ქართული ოცნების დამფუძნებლის, ბიძინა ივანიშვილის ინიციატივით შენდება.