აშშ-ის მიერ შემუშავებული სამშვიდობო გეგმა შესაძლოა იყოს საფუძველი უკრაინის ომის დასრულებაზე მოლაპარაკებებისთვის, თუმცა "დამატებით სამუშაოს" საჭიროებს — ასე შეაფასეს დასავლელმა ლიდერებმა ამერიკის შეერთებული შტატების მიერ მომზადებული უკრაინის 28-პუნქტიანი სამშვიდობო გეგმა. ამის შესახებ ინფორმაციას Reuters ავრცელებს.

სამხრეთ აფრიკაში გამართული G20-ის სამიტის კულუარებში, ევროპელი და სხვა დასავლელი ლიდერები ცდილობდნენ შეემუშავებინათ კოორდინირებული პასუხი აშშ-ის პრეზიდენტ დონალდ ტრამპის მოთხოვნაზე, რომ უკრაინამ 27 ნოემბრისთვის მიიღოს მისი 28-პუნქტიანი გეგმა.

უკრაინასა და მის ევროპელ პარტნიორებს სჯერათ, რომ ეს გეგმა შეიძლება იყოს მოლაპარაკებების საფუძველი, თუმცა აუცილებლად საჭიროებს ცვლილებებს.

აშშ-ის გეგმა, რომელიც რუსეთის რამდენიმე ძირითად მოთხოვნას მოიცავს, მრავალი მოკავშირის მხრიდან კრიტიკის საგნად იქცა. დასავლელი ლიდერები ერთდროულად ცდილობდნენ ტრამპის სამშვიდობო ძალისხმევის მხარდაჭერას და იმ პუნქტების მიუღებლობის ხაზგასმას, რომლებიც უკრაინისთვის მძიმეა.

ევროკავშირის, გერმანიის, საფრანგეთის, ბრიტანეთის, კანადის, ნიდერლანდების, ესპანეთის, ფინეთის, იტალიის, იაპონიისა და ნორვეგიის ლიდერებმა ერთობლივ განცხადებაში აღნიშნეს:

"28-პუნქტიანი გეგმის საწყის ვერსიაში არის მნიშვნელოვანი ელემენტები, რომლებიც აუცილებელია სამართლიანი და სტაბილური მშვიდობისთვის. ამიტომაც ეს გეგმა წარმოადგენს საფუძველს, რომელიც დამატებით მუშაობას საჭიროებს."

Reuters-ის ინფორმაციით, სამმა ამერიკელმა სენატორმა ივარაუდა, რომ გეგმა ამერიკელ ოფიციალურ პირებთან შესაძლოა რუსეთიდან გაიგზავნა.

სენატორმა მაიკ რაუნდსმა Halifax-ში განაცხადა: "ჩვენ მივიღეთ წინადადება, რომელიც ერთ-ერთ ჩვენს წარმომადგენელს გადაეცა. ეს არც ჩვენი რეკომენდაციაა და არც ჩვენი გეგმა."

თუმცა მოგვიანებით მარკო რუბიომ X-ზე დაწერა, რომ გეგმა ამერიკელ ოფიციალურ პირებს ეკუთვნით, "რუსული მხარის წინადადებების გათვალისწინებით", მაგრამ მისი განმარტებით, დაგეგმილია კონსულტაციები უკრაინასთანაც.

საფრანგეთის პრეზიდენტმა ემანუელ მაკრონმა განაცხადა, რომ ნებისმიერი გეგმა უნდა დაეფუძნოს ფართო კონსულტაციებს და უზრუნველყოს "მშვიდობა უკრაინელებისთვის და უსაფრთხოება ევროპელებისთვის".

ზელენსკის ბოლო განცხადებამ — რომ უკრაინა დგას არჩევანის წინაშე "ღირსების დაკარგვასა და აშშ-ის მხარდაჭერის დაკარგვას შორის" — კიდევ უფრო გააქტიურა ევროპელი ლიდერები.

გერმანიის კანცლერმა ფრიდრიხ მერცმა ხაზი გაუსვა, რომ უკრაინის მხარდაჭერა გადამწყვეტია მთელი ევროპის უსაფრთხოებისთვის:

"თუ უკრაინა ამ ომს წააგებს, ეს გავლენას მოახდენს ევროპულ პოლიტიკაზე მთლიანად. ახლა არის შანსი ომის დასრულებისთვის, მაგრამ ჯერ ძალიან შორს ვართ კარგად დაბალანსებული შედეგისგან."

შაბათს, ჩრდილოეთისა და ბალტიის ქვეყნის რვა ლიდერმა ზელენსკისთან ისაუბრა და იარაღის მიწოდების გაგრძელება დაუდასტურა. ერთობლივ განცხადებაში დანია, ესტონეთი, ფინეთი, ისლანდია, ლატვია, ლიტვა, ნორვეგია და შვედეთი ამბობენ:

"ჩვენ სრულად ვუჭერთ მხარს გადაწყვეტილებებს, რომლებიც პატივს სცემს უკრაინის სუვერენიტეტს და უზრუნველყოფს უფრო სტაბილურ, უსაფრთხო გარემოს უკრაინასა და ევროპაში."

ზელენსკიმ უკრაინელ ხალხს ერთობისკენ კიდევ ერთხელ მოუწოდა:

"ახლა უკრაინას შეიძლება ძალიან რთული არჩევანის გაკეთება მოუწიოს — ან დაკარგოს ღირსება, ან დაკარგოს ყველაზე ძლიერი პარტნიორი."

მან ასევე აღნიშნა, რომ იბრძოლებს გეგმაში ორი მთავარი ღირებულების — უკრაინელთა ღირსებისა და თავისუფლების შესანარჩუნებლად.

რა წერია ტრამპის 28-პუნქტიან უკრაინის სამშვიდობო გეგმაში?