ამერიკის შეერთებული შტატების პრეზიდენტის, დონალდ ტრამპის განცხადებით, გაეროს გენერალურ ასამბლეაზე სტუმრობისას ესკალატორი, სუფლიორი და მიკროფონი გაუმართავი იყო, რაც მისი თქმით, არა შემთხვევითობა, არამედ "სამმაგი საბოტაჟია". ტრამპი Truth Social-ზე წერს, რომ გაერთიანებული ერების ორგანიზაციამ დაკისრებული მოვალეობის შესრულება ვერ შეძლო, რაც "გასაკვირი არ არის".

"გუშინ გაერთიანებული ერების ორგანიზაციაში ნამდვილი სირცხვილი მოხდა — არა ერთი, არა ორი, არამედ სამი ძალიან საზარელი მოვლენა! პირველი, მთავარ სასაუბრო დარბაზში ასასვლელი ესკალატორი მომენტალურად ხმაურით გაჩერდა. საოცარია, რომ მელანია და მე ამ ფოლადის კიბეების ბასრ კიდეებზე წინ არ დავეცით. უბრალოდ, ორივეს მჭიდროდ გვეჭირა ხელი მოაჯირზე, თორემ კატასტროფა მოხდებოდა. ეს აბსოლუტურად საბოტაჟი იყო, როგორც ეს ერთი დღით ადრე გამოქვეყნებულ "პოსტში" იყო აღნიშნული The London Times-ში, სადაც ნათქვამი იყო, რომ გაეროს თანამშრომლები "ხუმრობდნენ ესკალატორის გამორთვაზე".

ადამიანები, რომლებმაც ეს გააკეთეს, უნდა დაეპატიმრებინათ! შემდეგ, როდესაც მთელი მსოფლიოს მასშტაბით მილიონობით ადამიანისა და დარბაზში მყოფი მნიშვნელოვანი ლიდერების წინაშე ვიდექი, ჩემი სუფლიორი არ მუშაობდა. ქვასავით ცივი სიბნელე იყო. მაშინვე გავიფიქრე: "ვაუ, ჯერ ესკალატორის გაჩერება და ახლა ცუდი სუფლიორი. რა ადგილია ეს?" შემდეგ სუფლიორის გარეშე გამოსვლა დავიწყე, რაც დაახლოებით 15 წუთის შემდეგ გასწორდა. კარგი ამბავი ის არის, რომ გამოსვლას ფანტასტიკური შეფასებები მოჰყვა. შესაძლოა, მათ დააფასეს ის ფაქტი, რომ ძალიან ცოტა ადამიანს შეეძლო იმის გაკეთება, რაც მე გავაკეთე. და მესამე, გამოსვლის შემდეგ მითხრეს, რომ აუდიტორიაში, სადაც გამოსვლა იმართებოდა, ხმა საერთოდ გამორთული იყო და მსოფლიო ლიდერები, თუ თარჯიმნის ყურსასმენებს არ გამოიყენებდნენ, ვერაფერს გაიგებდნენ. გამოსვლის დასასრულს პირველი, ვინც დავინახე, მელანია იყო, რომელიც წინ იჯდა. ვკითხე: "როგორ მოგეწონა?" მან კი მიპასუხა: "ვერც ერთი სიტყვა ვერ გავიგე, რაც თქვი". ეს შემთხვევითი არ იყო, ეს გაეროში სამმაგი საბოტაჟი იყო. მათ უნდა რცხვენოდეთ საკუთარი თავის. ამ წერილის ასლს გენერალურ მდივანს ვუგზავნი და დაუყოვნებლივ გამოძიებას მოვითხოვ. გასაკვირი არ არის, რომ გაერთიანებული ერების ორგანიზაციამ ვერ შეძლო იმ სამუშაოს შესრულება, რისთვისაც ის შეიქმნა. საქმეში საიდუმლო სამსახურია ჩართული. გმადლობთ ამ საკითხისადმი თქვენი ყურადღებისთვის!" — დაწერა ტრამპმა Truth Social-ზე.

ასევე იხილეთ: