ყოფილი პრემიერმინისტრი და პარტია გახარია საქართველოსთვის თავმჯდომარე გიორგი გახარია ლელო — ძლიერი საქართველოს ლიდერებს ციხიდან გათავისუფლებას ულოცავს.

მისი თქმით, "სანამ ოცნება ადამიანებს პოლიტიკური შეხედულების გამო უკანონოდ აკავებს, ოკუპანტები ოცნებას მადლობას უხდიან საქართველოსთვის ომზე პასუხისმგებლობის აკიდების გამო".

"ვულოცავ მამუკა ხაზარაძესა და ბადრი ჯაფარიძეს თავისუფლებას!
მხნეობასა და მალე გათავისუფლებას ვუსურვებ ყველა პოლიტიკურ პატიმარს!

სანამ ოცნება ადამიანებს პოლიტიკური შეხედულების გამო უკანონოდ აკავებს, ოკუპანტები მადლობას უხდიან ოცნებას საქართველოსთვის ომზე პასუხისმგებლობის აკიდების გამო.

ამ დროს ოპოზიცია ოპოზიციას ებრძვის — განსხვავებული პოზიციის გამო. ამასობაში კი ოცნება საქართველოს ეროვნულ ინტერესებს ღალატობს!

ამიტომაც, ახლა მთავარია საქართველოს თითოეული მოქალაქე დავარწმუნოთ, რომ ოცნება ჩვენს შვილებს მომავალს ართმევს!" — წერს გახარია სოციალურ ქსელში.

ლელო — ძლიერი საქართველოს ლიდერებმა, მამუკა ხაზარაძემ და ბადრი ჯაფარიძემ რუსთავის მე-12 დაწესებულება ცოტა ხნის წინ დატოვეს. ოპოზიციის ლიდერებმა რუსთავის ციხის დატოვების შემდეგ განაცხადეს, რომ სხვა ლიდერების მოწოდების მიუხედავად, ლელო ­— ძლიერი საქართველო 4 ოქტომბრის თვითმმართველობის არჩევნებში მონაწილეობას მიიღებს.

შეგახსენებთ, მამუკა ხაზარაძის და ბადრი ჯაფარიძის შეწყალების შესახებ განცხადება ოცნების არჩეულმა პრეზიდენტმა, მიხეილ ყაველაშვილმა დღეს, 5 სექტემბერს გაავრცელა.