დღეს, 28 აგვისტოს ღამით კიევზე რუსეთის მასშტაბური დარტყმის შედეგად დაღუპულთა რიცხვი 12-მდე გაიზარდა და 48 დაშავდა. ინფორმაციას უკრაინული მედია ავრცელებს და კიევის მერზე დაყრდნობით წერს, რომ დაღუპულთა შორის 7, 10 და 11 წლის ბავშვები არიან.

ამ დრომდე საცხოვრებელი შენობის ნანგრევების გაწმენდა მიმდინარეობს. უკრაინის პრეზიდენტის განცხადებით, "შესაძლოა ნანგრევების ქვეშ კიდევ იყვნენ ადამიანები".

ვოლოდიმირ ზელენსკი ამბობს, რომ ოკუპანტების დღევანდელი იერიში "ნათელი პასუხია" მსოფლიოში ყველასთვის, ვინც რუსეთს ცეცხლის შეწყვეტისა და რეალური დიპლომატიისკენ მოუწოდებდა.

უკრაინის პრეზიდენტის განცხადებით, "რუსეთი ირჩევს ბალისტიკას და არა მოლაპარაკებების მაგიდას"

"დღევანდელი რუსული რაკეტები და დრონებით თავდასხმები ნათელი პასუხია მსოფლიოში ყველასთვის, ვინც კვირების და თვეების განმავლობაში მოუწოდებდა რუსეთს ცეცხლის შეწყვეტისა და რეალური დიპლომატიისკენ. რუსეთი ირჩევს ბალისტიკას და არა მოლაპარაკებების მაგიდას. ის ირჩევს მკვლელობის გაგრძელებას და არა ომის დასრულებას. ეს კი ნიშნავს, რომ რუსეთს შედეგების არ ეშინია. რუსეთი კვლავ სარგებლობს იმით, რომ მსოფლიოს სულ მცირე ნაწილი თვალს ხუჭავს მოკლულ ბავშვებზე და პუტინის გამართლებას ცდილობს", — აღნიშნა ზელენსკიმ.