რუსეთის პრეზიდენტი ვლადიმერ პუტინი ბრაზილიაში დაგეგმილ BRICS-ის სამიტს, სისხლის სამართლის საერთაშორისო სასამართლოს (ICC) მიერ გაცემული დაპატიმრების ორდერის გამო, ფიზიკურად ვერ დაესწრება და, სავარაუდოდ, დისტანციურად ჩაერთვება. ინფორმაცია რუსეთის პრეზიდენტის საგარეო პოლიტიკის თანაშემწემ იური უშაკოვმა 25 ივნისს გაავრცელა.

"ეს დაკავშირებულია გარკვეულ სირთულეებთან სისხლის სამართლის სასამართლოს მოთხოვნების კონტექსტში, როგორც იცით, და სწორედ ამ კონტექსტში, ბრაზილიის მთავრობამ ვერ შეძლო მკაფიო პოზიციის დაკავება, რომელიც ჩვენს პრეზიდენტს საშუალებას მისცემდა მონაწილეობა მიეღო ამ შეხვედრაში", — თქვა უშაკოვმა.

აღსანიშნავია, რომ ბრაზილია სისხლის სამართლის საერთაშორისო სასამართლოს წევრი და რომის წესდების ხელმომწერია, რაც ნიშნავს, რომ ის ვალდებულია დააკავოს პუტინი, თუ ის ქვეყანაში შევა.

უშაკოვის თქმით, BRICS-ის სამიტს, რომელიც 6-7 ივლისს არის დაგეგმილი, დაესწრება რუსეთის საგარეო საქმეთა მინისტრი სერგეი ლავროვი. პუტინი კი სავარაუდოდ, დისტანციურად, ვიდეომიმართვით მიიღებს მონაწილეობას.

ცნობისთვის, BRICS სამთავრობათაშორისო ორგანიზაციაა და მისი წევრი ათი ქვეყანაა — ბრაზილია, რუსეთი, ინდოეთი, ჩინეთი, სამხრეთ აფრიკა, ეგვიპტე, ეთიოპია, ინდონეზია, ირანი და არაბთა გაერთიანებული საამიროები.

შეგახსენებთ, სისხლის სამართლის საერთაშორისო სასამართლო პუტინის დაპატიმრების ორდერი 2023 წლის მარტში გასცა, რუსეთის მიერ უკრაინაში სრულმასშტაბიანი შეჭრის დროს უკრაინელი ბავშვების უკანონო დეპორტაციისთვის.

2024 წლის ნოემბერში პუტინმა გამოტოვა G20-ის სამიტი ბრაზილიაში და იქ ლავროვი გაგზავნა.

ივნისის დასაწყისში მოსკოვმა განაცხადა, რომ პუტინმა მიიღო ოფიციალური მოწვევა G20-ის სამიტზე დასასწრებად სამხრეთ აფრიკაში, ICC-ის კიდევ ერთ წევრ სახელმწიფოში. ღონისძიება დაგეგმილია იოჰანესბურგში 22-დან 23 ნოემბრამდე.

აღსანიშნავია ისიც, რომ 2024 წლის სექტემბერში პუტინი ვიზიტით იმყოფებოდა მონღოლეთში, რომელიც ასევე ICC-ის ხელმომწერია. იმ დროისთვის მონღოლეთის მიმართ ბევრი კრიტიკა ისმოდა ორდერის აღუსრულებლობის გამო.