შაბათს დილით, პოლიციელის ფორმაში ჩაცმულმა ნიღბიანმა შეიარაღებულმა პირმა მინესოტას შტატის წარმომადგენელთა პალატის წევრი, მელისა ჰორტმანი და მისი მეუღლე მოკლა. ამის შესახებ ინფორმაციას ABC ავრცელებს.

თავდამსხმელმა, რომელიც 57 წლის ვენს ლუთერ ბოელტერად არის იდენტიფიცირებული, ასევე დაჭრა შტატის სენატორი ჯონ ჰოფმანი და მისი მეუღლე, ივეტი, მათივე სახლში. ამ დროისთვის მათ ოპერაცია უტარდებათ.

ეს ქმედება გუბერნატორმა ტიმ უოლცმა "მიზანმიმართული პოლიტიკური ძალადობის" აქტად შეაფასა.

ბოელტერი, ყოფილი კერძო დაცვის ხელმძღვანელი, რომელსაც სამხედრო წვრთნები აქვს გავლილი, კვლავ თავისუფალია. ბოლოს ის გაქცევისას ნახეს ჰორტმანის რეზიდენციაში პოლიციასთან დაპირისპირების შემდეგ. ხელისუფლების წარმომადგენლების თქმით, მას რეალისტური ლატექსის ნიღაბი ეკეთა და პოლიციის მანქანის მსგავს ავტომობილს მართავდა.

ABC-ის ცნობით, პოლიციამ ბოელტერის მანქანაში მსხვერპლთა სია აღმოაჩინა, რომელშიც ათობით მინესოტას დემოკრატი პოლიტიკოსი იყო დასახელებული, მათ შორის გუბერნატორი უოლცი, ილჰან ომარი, სენატორი თინა სმიტი და გენერალური პროკურორი კიტ ელისონი, ასევე აბორტის პროვაიდერები და აბორტის მომხრე აქტივისტები.

ეჭვმიტანილის სიაში მყოფი სხვა პირებისთვის უსაფრთხოების ზომები გაძლიერებულია.

სამართალდამცავი ორგანოები მოუწოდებენ მოსახლეობას, იყვნენ ფხიზლად და თავი შეიკავონ მარტოხელა პოლიციელებთან ურთიერთობისგან, თუ მათი ვინაობა დადასტურებული არ არის. ძებნა გრძელდება.