ოცნების პრემიერი, ირაკლი კობახიძემ 26 მაისს ვაიმარის სამკუთხედის მიერ გავრცელებულ განცხადებას გამოეხმაურა. სადაც სამი ევროპული ქვეყნის ლიდერი გმობს "საქართველოს ხელისუფლების ყველა ქმედებას, რომელიც იწვევს დემოკრატიულ უკუსვლას, და სამოქალაქო საზოგადოებაზე, მედიაზე და მთავრობის მიმართ კრიტიკულად განწყობილ ადამიანებზე თავდასხმებს".

"რაც შეეხება ამ სამმხრივ გაცხადებას, პირდაპირ ჩანს, რომ ევროპაში მძლავრობს "დიფ სთეითი". ეტიკეტის ამბავია, რომ ასეთი ტიპის განცხადება არ უნდა გაავრცელო. 26 მაისი არის საზეიმო დღე და საზეიმო დღეს მიღებულია საზეიმო წერილების გამოგზავნა. საზეიმო განცხადებების გაკეთება. პროტოკოლს და ეტიკეტსაც არ იცავენ. აქედან ჩანს, რომ ისინი ვერ მოქმედებენ ობიექტური ინტერესების შესაბამისად და უწევთ ისეთი ხაზით მუშაობა, რაც არ შეესაბამება მათ ინტერესს.

რაც შეეხება მაკრონს, მე რაც მითხრა მან ალბანეთში, არის თავისი არსით წინააღმდეგობაში იმ განცხადებასთან, რომელიც გავრცელდა. აქედანაც ჩანს, რომ ადამიანები ვერ იღებენ დამოუკიდებლად გადაწყვეტილებებს. არის დიდი სერიოზული გავლენა ევროპაში, ევროპის ქვეყნებში და ეს ყველაფერი იწვევს იმ აღრევას, რომელსაც ყველა ვხედავთ", — თქვა კობახიძემ.