9 აპრილს რუსეთში, ჩეჩნეთის რესპუბლიკაში, ქალაქ აჩხოი-მარტანში, პოლიციელის მოკვლისთვის ლიკვიდირებული 17 წლის ბიჭის გვამი ქალაქის მოედანზე დემონსტრაციულად დააგდეს — ამის შესახებ "ნოვაია გაზეტა" წერს.

ჩეჩნეთის ოპოზიციური ტელეგრამ-არხ NIYSO-ზე ასევე ვრცელდება კადრები, სადაც მოკლულის გვამის გარშემო მოქალაქეები ქალაქის მოედანზე მდუმარედ დგანან. 16-წამიანი ვიდეო აჩხოი-მარტანის ადმინისტრაციის შენობასთანაა გადაღებული.

გაფრთხილება: ვიდეო შეიცავს მძიმე კადრებს

7 აპრილს, ჩეჩნეთის რესპუბლიკაში, ქალაქ აჩხოი-მარტანში, დანით შეიარაღებული 17 წლის ახალგაზრდა კაცი საგზაო საპატრულო სამსახურის თანამშრომლებს დაესხა თავს. თავდამსხმელმა პოლიციელის ორი თანამშრომელი დანით დაჭრა. მოგვიანებით ცნობილი გახდა, რომ ერთ-ერთი დაჭრილი პოლიციელი საავადმყოფოში გარდაიცვალა.

ჩეჩნეთის მთავრობის მიერ კონტროლირებადი არხი გროზნო ტვ იტყობინება, რომ 17 წლის ბიჭს თავდასხმისას გაუხსნეს ცეცხლი და ადგილზე ჩაცხრილეს.

"ნოვაია გაზეტა" წერს, რომ 9 აპრილის დილას ადგილობრივები აჩხოი-მარტანის ცენტრალურ მოედანზე ახსნა-განმარტების გარეშე დაიბარეს და იქ ფეხშიშველი მოზარდის ცხედარი დაახვედრეს, რომლის გარეგნობაც სავარაუდო თავდამსხმელის გარეგნობას ემთხვეოდა.

მათი ცნობით, საჯარო შეკრებაზე 15 წლამდე სკოლის ასაკის ბავშვებსაც აიძულეს მისვლა. ადგილობრივების ცნობით, რამდენიმე ქალმა ცხედრის ნახვის შემდეგ გონება დაკარგა, ზოგიერთმა კი მოედნის დატოვება სცადა, მაგრამ ამის უფლება არ მისცეს.

NIYSO წერს, რომ საჯარო შეკრებაზე მოსულებს უთხრეს: "დღეს თუ თქვენი შვილი უყურებს სხვის ცხედარს, ხვალ შეიძლება ის იყოს მის ადგილას".

ჩეჩნეთის ლიდერის, რამზან კადიროვის თქმით, თავდამსხმელის უკან უკრაინული სპეცსამსახურები დგანან. მან დამნაშავის ოჯახის წევრების ჩეჩნეთის რესპუბლიკიდან გაძევება მოითხოვა.

"შსს-მ და როსგვარდიამ, ფსბ-სთან ერთად, რესპუბლიკის ტერიტორიიდან უნდა გააძევოს დამნაშავეების მამები და შვილები," — თქვა კადიროვმა.

NIYSO-ს ცნობით, ჩეჩნეთის ხელისუფლებამ "დამნაშავის" ოჯახის სულ მცირე ექვსი წევრი დააკავა. ჩეჩნეთში დამნაშავის ოჯახების დასჯას დიდი ისტორია არსებობს. რამზან კადიროვმა ივნისში მოსახლეობა გააფრთხილა, რომ ჩადენილი დანაშაულისთვის ხელისუფლება "მოკლავს ყველას — დამნაშავის მამას, ძმას, ბიძას".