ქართული ოცნების იუსტიციის მინისტრ ანრი ოხანაშვილის ბრძანებით, 2025 წლის 4 ივნისიდან იცვლება საქართველოს მოქალაქის პირადობის ელექტრონული მოწმობის, დროებითი ბინადრობის, მუდმივი ბინადრობისა და დროებითი საიდენტიფიკაციო ელექტრონული მოწმობების ტექნიკური მახასიათებლები/ფორმები.

მთავარი სიახლე ახალ ID ბარათებში ისაა, რომ მათზე დატანილი იქნება QR კოდი, რომლიც დოკუმენტზე დატანილი ინფორმაციის ონლაინ გადამოწმებას გახდის შესაძლებელს.

ანრი ოხანაშვილის მიერ ხელმოწერილი დადგენილების თანახმად, მოწმობაზე დატანილი უნდა იყოს პიროვნების სახელი, გვარი, სქესი, მოქალაქეობა, დაბადების თარიღი, დაბადების ადგილი, პირადი ნომერი, ფოტოსურათი, პირადი ხელმოწერის ნიმუში, გამცემი ორგანოს დასახელება, დოკუმენტის გაცემის თარიღი, მოწმობის მოქმედების ვადა.

ძველიდან ახალ დადგენილებაში გადმოტანიალია დათქმა, რომლის მიხედვითაც, პირადობის მოწმობა შეიძლება შეიცავდეს ნებისმიერი ციფრის კომბინაციას, გარდა იმ შემთხვევებისა, როცა ერთმანეთის მიყოლებით შეიძლება მოხვდეს სამი ექვსიანი (666XX, X666X, XX666).

ID ბარათების გაცემის დროს მისანიჭებელ ნუმერაციაში ეს შეზღუდვა 2011 წელს ჩაიდო, რადგან მოქალაქეთა ნაწილი სამ ექვსიანს ეშმაკის ნიშნად მიიჩნევდა.