“უკრაინის ხელისუფლებამ უარყო აშშ-ის ადმინისტრაციის მიერ შეთავაზებული ბუნებრივი რესურსების შეთანხმების ახალი ვერსია, რომელიც ვაშინგტონისთვის 500 მილიარდი აშშ დოლარის ღირებულების რესურსების გადაცემას ითვალისწინებდა,” — ინფორმაციას Bloomberg-ი უკრაინელ ოფიციალურ პირებზე დაყრდნობით ავრცელებს.

The New York Times-ს ცნობით, აშშ-სა და უკრაინას შორის რესურსების შესახებ შეთანხმების ახალი ვერსიის თანახმად, მიღებული შემოსავალი უნდა გაიგზავნოს ფონდში, სადაც აშშ 100%-ს მიიღებს.

ახალი შეთანხმების თანახმად, უკრაინამ ფონდში წვლილი მანამ უნდა შეიტანოს, სანამ ის 500 მილიარდ დოლარს არ მიაღწევს. შეგახსენებთ, აშშ-ის პრეზიდენტი, დონალდ ტრამპი უკრაინისადმი გაწეული ამერიკული დახმარების სანაცვლოდ მათგან 500 მილიარდ დოლარის ბუნებრივ წიაღისეულს ითხოვს.

უკრაინელმა ოფიციალურმა პირმა Bloomberg-ს განუცხადა, რომ უკრაინის შეფასებით, შეერთებული შტატების მიერ გაწეული დახმარება “ფაქტობრივი თანხა დაახლოებით ხუთჯერ ნაკლებია და 90 მილიარდ დოლარზე მეტია”.

ასევე წყაროს ინფორმაციით, კიდევ ერთი დაბრკოლება აშშ-ის მხრიდან მომავალი სამხედრო და ფინანსური დახმარების გარანტიების არ არსებობაა.