ვირი, სახელად პერი, რომელიც თავის დროზე შრეკის ცნობილი პერსონაჟის პროტოტიპად იქცა, 30 წლისა მოკვდა. ცხოველი, რომელიც კალიფორნიის შტატის ქალაქ პალო-ალტოში, ვირების ერთგვარ თავშესაფარში ცხოვრობდა, დიდი ხნის განმავლობაში იტანჯებოდა ჩლიქების ანთებით, რის გამოც მისთვის ევთანაზიის გაკეთება გადაწყდა.

"იგი აქ ყველას უყვარდა და ახლა ყველა გლოვობს", — ამბობს თავშესაფრის მოხალისე ჯენი კირატლი და იხსენებს, რომ პერი მათთან 1997 წელს მოხვდა, როცა მხოლოდ სამი წლის იყო, — "როგორც გვიყვებიან, მას ცხენბურთში მონაწილე ცხოველების დასამშვიდებლად წვრთნიდნენ, მაგრამ თავად ძალიან შარიანი იყო და ამ საქმეს თავი ვერ გაართვა".

შარიანად წოდებულმა, მაგრამ მაინც მხიარულმა და საკმაოდ თავისებურმა პერიმ კი პალო-ალტოში ყველას შეაყვარა თავი, განსაკუთრებით ბავშვებს, რომლებიც მის სანახავად ხშირად მიდიოდნენ; თანაც ისე, რომ წარმოდგენა არ ჰქონდათ, თავიანთი საყვარელი პერსონაჟის მოდელს თუ ხვდებოდნენ.

ეს ამბავი კი თურმე ასე მომხდარა: შრეკის ერთ-ერთი ანიმატორი ქალაქის მახლობლად ცხოვრობდა და ვირის შესახებ ცოლისგან შეუტყვია. მოგვიანებით, იგი პერის კინოსტუდიის გუნდთან ერთად ეწვია და რამდენიმე საათი გაატარა მასზე დაკვირვებაში.

"შემიძლია დარწმუნებით გითხრათ, რომ შრეკის ვირს თავისი სახასიათო ჩვევები — თავის გადაბრუნება, თვალების ატრიალება, მოუსვენარი ჩორთი — სწორედ პერისგან აქვს აღებული", — აღნიშნავს კირატლი.

პერიმ თავისი კვალი ნამდვილად დატოვა — ედი მერფის მიერ გახმოვანებული პერსონაჟი ერთ-ერთ ყველაზე პოპულარულ ანიმაციურ გმირად იქცა. მეტიც, შრეკის შემქმნელი კინოსტუდია DreamWorks სამომავლოდ აპირებს, ვირის პერსონაჟზე ცალკე ფილმი გადაიღოს.