დღეს, 27 ნოემბერს, პაკისტანში, პარლამენტთან, უსაფრთხოების ძალებსა და პროტესტის მონაწილეებს შორის შეტაკების დროს დაახლოებით ექვსი ადამიანი, მათ შორის ოთხი სამხედრო ჯარისკაცი იქნა მოკლული. პროტესტის მონაწილეები ყოფილი პრემიერმინისტრის, იმრან ხანის გათავისუფლებას ითხოვენ.

პაკისტანის ყოფილი პრემიერმინისტრის, იმრან ხანის ათასობით მხარდამჭერმა, 26 ნოემბერს, პრემიერმინისტრის გათავისუფლების მოთხოვნით, დედაქალაქის ირგვლივ არსებული ბარიკადები გაარღვია და ისლამაბადისკენ აიღო გეზი, რის შემდეგაც უსაფრთხოების ძალებთან შეტაკება მოხდა.

როგორც პაკისტანელი მაღალჩინოსნები ამბობენ, მომიტინგეები ფოლადის ჯოხებით იყვნენ შეიარაღებული და საპროტესტო მსვლელობასთან ერთად ხეებსა და ბალახებს უკიდებდნენ ცეცხლს.

პაკისტანის მოქმედმა პრემიერმინისტრმა, შეჰბაზ შარიფმა შეტაკების შედეგად ჯარისკაცების დაღუპვაში მომიტინგეები დაადანაშაულა და აღნიშნა, რომ ეს იმის გამო მოხდა, რომ მანქანის კოლონებმა სამხედროებს გადაუარეს.

"ეს არ არის მშვიდობიანი პროტესტი. ეს არის ექსტრემიზმი", — განაცხადა შარიფმა.

ხანის პარტია "პაკისტან ტეჰრეკ ე ინსააფის" სპიკერმა, ზულფიკარ ბუხარიმ განაცხადა, რომ შეტაკების შედეგად დამატებით ორი პირი იქნა მოკლული, ხოლო 30 — დაშავებული. მისი თქმით, ეს ყველაზე საშინელი პოლიტიკური ძალადობაა, რომელიც 241-მილიონიან ნაციაში მოხდა.

ამასთან, ბუხარის ინფორმაციით, ერთ-ერთ მომიტინგეს ესროლეს, შედეგად ის ადგილზევე გარდაიცვალა, ხოლო მეორეს — მანქანამ გადაუარა. ხელისუფლებამ მათი გარდაცვალება ოფიციალურად არ დაადასტურა.

Amnesty International-ის თქმით, მთავრობამ სრულად უნდა დაიცვას მომიტინგეების უფლებები და დაუყოვნებლივ გააუქმოს ბრძანებები "იმ მომიტინგეების მიზანში ამოღებასა და სროლაზე, რომლებიც თვალში მოხვდებათ". მათ მოითხოვეს იმ ბრძანებების გაუქმებაც, რომელიც, მათი თქმით, სამხედროებს არასათანადო და გადაჭარბებულ უფლებამოსილებას ანიჭებს.

ინფორმაციისთვის, პაკისტანის ყოფილი პრემიერმინისტრი იმრან ხანი 2023 წლის 9 მაისს ისლამაბადის უმაღლესი სასამართლოში, კორუფციის ბრალდებით Al-Qadir Trust-თან დაკავშირებით, დააკავეს.