რადიო თავისუფლების ინფორმაციით, ევროკავშირის ტექნიკური მისია, რომელიც 26 ოქტომბრის საპარლამენტო არჩევნებში გამოვლენილ დარღვევებს შეისწავლის, საქართველოში უახლოეს კვირებში ჩამოვა. ამის შესახებ გამოცემას ევროკომისიის პრესსპიკერმა საგარეო ურთიერთობათა საკითხებში, პიტერ სტანომ უთხრა.

"საამისოდ მზადება მიმდინარეობს. მისიის შესახებ უფრო მეტი დეტალი შესაფერის დროს გახდება ცნობილი", — რადიო თავისუფლების ცნობით, გამოცემას წერილობით უპასუხა სტანომ.

რადიო თავისუფლება ასევე წერს, რომ სტანოს თქმით, ევროკავშირის წევრი ქვეყნების წინაშე მოხსენებით ეუთო/ოდირის სადამკვირვებლო მისიის ხელმძღვანელი წარდგება, რომელიც ისაუბრებს, თუ როგორ უპასუხეს საარჩევნო დარღვევებთან დაკავშირებით არსებულ საჩივრებს.

18 ნოემბერს ევროკავშირის საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა, ჯოზეფ ბორელმა პრესბრიფინგზე განაცხადა, რომ საქართველოში ჩამოვიდოდა ტექნიკური მისია, რომლის მიზანია, ადგილზე გაანალიზოს სიტუაცია და შეაფასოს, თუ რა მოხდა [26 ოქტომბრის] არჩევნებზე, რომლის სამართლიანობაც ეჭვქვეშ დგას.