საერთაშორისო გამჭვირვალობა — საქართველოს აღმასრულებელი დირექტორის, ეკა გიგაურის თქმით დღეს, 6 ნოემბერს, თბილისის სააპელაციო სასამართლოში, არჩევნების დღეს ხმის ფარულობის დარღვევის ფაქტებზე გამართული მოსმენისას, მოსამართლე დიმიტრი გვრიტიშვილმა ექსპერიმენტი ჩაატარა იმის დასადგენად, გაჟონავდა თუ არა ფლომასტერი საარჩევნო ბიულეტენის უკანა მხარეს.

ეკა გიგაური აღნიშნავს, რომ გვრიტიშვილის ექსპერიმენტისას ფლომასტერის კვალი ბიულეტენის უკანა მხარეს გამოჩნდა, თუმცა მოსამართლეს ამაზე რეაგირება არ მოუხდენია.

"იურისტებმა მოითხოვეს, მოსამართლეს თავად შეეცურებინა კონვერტი. მოსამართლე მივიდა, მოიმარჯვა ფურცელი და ჰოი საოცრებავ, გამოჩნდა შავი წერტილი... მოკლედ, ამაბავი ისაა, რომ ამჯერადაც არაფერი გამოუვიდათ, ის საბედისწერო შავი წერტილი მაინც გამოჩნდა, თუმცა მიუხედავად ამისა, აბა გამოიცანით, რა დაინახა მოსამართლე გვრიტიშვილმა... სავარუდოდ არაფერი… ვნახოთ… ვიდეო არ გადაგვაღებინეს", — წერს TI-ის აღმასრულებელი დირექტორი Facebook-ზე.

ცოტა ხნით ადრე, სააპელაციო სასამართლომ სამართლიანი არჩევნების (ISFED) არც ერთი სარჩელი არ დააკმაყოფილა. გარდა ამისა, გააუქმა გორის სასამართლოს გადაწყვეტილება 15 უბნის ბათილი ბიულეტენების გადათვლაზე.