ხუთშაბათ დილით, ისრაელმა იერიში მიიტანა ლიბანის დედაქალაქ ბეირუთზე. თავდაცვის ძალების თანახმად, ავიადარტყმის სამიზნე ჰეზბოლას ერთ-ერთი ობიექტი იყო.

Reuters-ი წერს, რომ აფეთქების სამიზნე ბეირუთის ცენტრალურ უბანში პარლამენტის მახლობლად მდებარე შენობა იყო.

ლიბანის ჯანდაცვის ოფიციალურმა წარმომადგენლებმა განაცხადეს, რომ სულ მცირე ექვსი ადამიანი დაიღუპა და შვიდი დაიჭრა. ლიბანურ WhatsApp ჯგუფებში გავრცელებულ ფოტოზე, რომლის გადამოწმებაც Reuters-მა ვერ შეძლო, ჩანს ძლიერად დაზიანებული შენობა, რომლის პირველი სართული იწვა.

სამი რაკეტა ჩამოვარდა სამხრეთ გარეუბანში, სადაც გასულ კვირას ჰეზბოლას ლიდერი ჰასან ნასრალა დაიღუპა.

1-ელ ოქტომბერს ირანმა ისრაელზე სარაკეტო შეტევა განახორციელა და ქვეყანაში დაახლოებით 180 ბალისტიკური რაკეტა გაისროლა. თეირანის განცხადებით, ეს ირანის პასუხია მისი მოკავშირეების — დაჯგუფებების ჰამასის და ჰეზბოლას ლიდერების მკვლელობაზე ისრაელის წინააღმდეგ ბრძოლაში.

ისრაელმა პირობა დადო, რომ ირანის თავდასხმებს უპასუხებს. პარალელურად, ირანი აგრძელებს ჰეზბოლას სამიზნეების დარტყმას ლიბანში, მათ შორის ქვეყნის დედაქალაქ ბეირუთში, ასევე სახმელეთო სამხედრო ოპერაციას, რომელიც რამდენიმე დღის წინ დაიწყო ამ ქვეყნის სამხრეთით.