გირჩში აცხადებენ, რომ ცესკოში წარდგენილი გაყალბებული 27 990 ხელმოწერიდან 13 რეალური ხელმოწერა აღმოაჩინა. ამის შესახებ პარტიამ განცხადება ცესკოდან უარის მიღების მეორე დღეს, 9 აგვისტოს გაავრცელა.

პარტიაში ამბობენ, რომ მატ ყალბი ხელმოწერები ოფისში დაამზადეს და საჯაროდ განაცხადეს. მათი თქმით, ცესკომ ხელმოწერები ბათილად ცნო არა სიყალბის, არამედ ტექნიკური ხარვეზის გამო.

"ყოველივე ეს ნათლად აჩვენებს რომ ხელმოწერების წარდგენასთან დაკავშირებული კანონის ეს მოთხოვნა რეალურად გულისხმობს მხოლოდ მაკულატურის შეგროვებას და უბიძგებს პარტიებს არა რეალური მხარდამჭერების მოძიებისკენ, არამედ ცესკოს ბლანკებში არსებული ბაზებიდან მონაცემების ზედმიწევნით სიზუსტით გადაწერისკენ", - აცხადებენ გირჩში.

მათი თქმით, ყველა პარტია მათნაირად აყალბებს არჩევნებისთვის მოქალაქეთა ხელმოწერას, თუმცა საჯაროდ არავის უსაუბრიათ. გირჩში მიაჩნიათ, რომ პარტიები ან ვერ აცნობიერებენ პროცესების აბსურდულობას ან საკუთარ თავზე ირგებენ.

"ჩვენ შევეცადეთ საკუთარ მაგალითზე გვეჩვენებინა თუ რა წარმოუდგენელი მასშტაბის მარაზმია არსებული სისტემა და ქვეყანაში დემოკრატიის განვითარებისთვის ერთ-ერთი უმნიშვნელოვანესი ინსტიტუტი - ცესკო - როგორ აზრდაუტანებლად ასრულებს არსებულ არქაულ და სასაცილო რეგულაციებს. ეს ინსტიტუტი და ეს სისტემა ატარებს ამ ქვეყანაში არჩევნებს. ეს ინსტიტუტი და ეს სისტემა წყვეტს ვის ხელში იქნება ძალაუფლება ამ ქვეყანაში", - ამბობენ გირჩში.

ცენტრალურმა საარჩოვნო კომისიამ პარტია გირჩის მიერ წარდგენილი 27 990 ხელმოწერიდან 27 977 ბათილად მიიჩნია. ცესკოს პრეს-სპიკერი ანა მიქელაძე On.ge-სთან საუბარში განმარტავს, რომ ბათილად სცნეს ყველა ის ხელმოწერა, რომელსაც არ ადასტურებდა ხელმოწერების შეგროვებაზე პასუხისმგებელი პირი, ან რომელშიც სრულად არ იყო მითითებული კანონით გათვალისწინებული მონაცემები.