"ქართული ოცნების საპატიო თავმჯდომარე, ბიძინა ივანიშვილი რაჭაში, ამბროლაურში, მოსახლეობასთან შეხვედრაზე, კვლავ დაჯავშნილი მინით ჩავიდა. ცალკეა გამოყოფილი ტრიბუნა ქართული ოცნების სხვა ლიდერებისთვის. ინფორმაციას ტვ პირველი ავრცელებს.

სიტყვით გამოსვლისას ივანიშვილმა განაცხადა, რომ ქვეყნის მშვიდობის გარანტი არჩევნებში ქართული ოცნების გამარჯვებაა.

“ქვეყნის ომის მოსურნეები, შიდა თუ გარე მტრები ჩასაფრებული ელოდებიან უმცირეს შანსსაც კი, რომ ეროვნული ხელისუფლება აგენტურით შეცვალონ. რაც პირდაპირ ნიშნავს ბომბების წვიმას და ქვეყნის განადგურებას. იოტისოდენა შეცდომის დაშვების უფლებაც არ გვაქვს.

ჩემო რაჭველებო, ლეჩხუმელებო და სვანებო, ვისთვისაც მნიშვნელოვანია მშვიდობა, კეთილდღეობა და ეროვნული ღირსების შენარჩუნება, 26 ოქტომბერს გავიდეთ არჩევნებზე და გადამწყვეტი ნაბიჯი გადავდგათ ჩვენი ქვეყნის მშვიდობიანი მომავლისთვის. მხოლოდ მშვიდობით ღირსებით და კეთილდღეობით ევროპისკენ“, — განაცხადა ივანიშვილმა.

შეგახსენებთ, რომ ბიძინა ივანიშვილი მოსახლეობას ტყვიაგაუმტარი აკვარიუმით მიმართა ასევე მცხეთაში, ოცნების ყრილობაზე.