უკრაინის პრეზიდენტმა ვოლოდიმირ ზელენსკიმ და კანადის პრემიერმინისტრმა მარკ კარნიმ ხელი მოაწერეს დეკლარაციას 100-წლიანი პარტნიორობის შესახებ, რომელიც ითვალისწინებს ორ ქვეყანას შორის ორმხრივი ურთიერთობების გაძლიერებას სხვადასხვა სფეროში, მათ შორის თავდაცვისა და უკრაინის შეიარაღებული ძალების დახმარების მიმართულებით. ამის შესახებ ინფორმაციას უკრაინული მედია ავრცელებს.

უკრაინის და კანადის ლიდერებმა ხაზი გაუსვეს უკრაინაში რეფორმების გაგრძელების მნიშვნელობას ევროკავშირსა და NATO-ში გაწევრიანების გზაზე.

"კანადა რჩება ერთგულ პარტნიორად ამ ძალისხმევის მხარდაჭერაში", — აღნიშნულია განცხადებაში.

დოკუმენტში ხაზგასმულია, რომ კანადა გააგრძელებს "უკრაინის გადაუდებელი სამხედრო საჭიროებების დაკმაყოფილებას და ოპერაცია UNIFIER-ის [უკრაინის მხარდამჭერი საწვრთნელო მისია] მხარდაჭერას, რომელიც 2029 წლამდე გაგრძელდა".

კანადა ასევე გააგრძელებს უკრაინის შეიარაღებული ძალების გაძლიერებას; განსაკუთრებული ყურადღება დაეთმობა "საჰაერო თავდაცვის სისტემების გადაუდებელ საჭიროებას, უზრუნველყოფს სწავლებას, სამხედრო აღჭურვილობას, საბრძოლო მასალასა და სხვა კრიტიკულად მნიშვნელოვან სამხედრო მხარდაჭერას".

"ორივე ქვეყანა გააღრმავებს თანამშრომლობას დაზვერვის, კიბერდაცვის, დრონების საწინააღმდეგო და ელექტრონული ჩახშობის სისტემების სფეროებში, ასევე ჰიბრიდულ საფრთხეებსა და უცხოურ საინფორმაციო მანიპულაციებთან ბრძოლაში. კანადა გააგრძელებს პარტნიორებთან მუშაობას პოლიტიკურად და იურიდიულად სავალდებულო უსაფრთხოების გარანტიების სისტემის შესაქმნელად, რათა რუსეთის ფედერაციის ნებისმიერი მომავალი აგრესია თავიდან იქნეს აცილებული", — ნათქვამია განცხადებაში.

დოკუმენტში ასევე აღნიშნულია, რომ ქვეყნები გააფართოებენ ვაჭრობასა და ინვესტიციებს მოდერნიზებული თავისუფალი ვაჭრობის შეთანხმების ფარგლებში, ხელს შეუწყობენ საჯარო-კერძო პარტნიორობის განვითარებას და უკრაინის აღდგენისა და რეკონსტრუქციისთვის საჭირო კაპიტალისა და რისკების შემცირებაზე იზრუნებენ.

ცალკე შეთანხმდნენ კანადა და უკრაინა თანამშრომლობის გაღრმავებაზე ენერგეტიკული უსაფრთხოებისა და კრიტიკული სასარგებლო წიაღისეულის, მრეწველობისა და ტყის რესურსების მდგრადი მართვის სფეროებში, ასევე განამტკიცებენ კავშირებს ინოვატორებსა და მკვლევრებს შორის ხელოვნური ინტელექტის, კიბერუსაფრთხოების, კოსმოსის, ბიოტექნოლოგიისა და ციფრული მმართველობის მიმართულებით.

ქვეყნები ასევე ითანამშრომლებენ შავ ზღვაში საიმედო და უსაფრთხო ნავიგაციის უზრუნველსაყოფად, ასევე რუსეთის "ჩრდილოვანი ფლოტის" საქმიანობის შეფერხებისა და შეკავების მიზნით.

გარდა ამისა, კანადამ აიღო ვალდებულება, შეინარჩუნოს და გაძლიეროს ეკონომიკური ზეწოლა რუსეთზე.