პარიზი მოუთმენლად ელის სელინ დიონის სცენაზე დაბრუნებას. 4-წლიანი პაუზის შემდეგ მომღერალი პირველ კონცერტს სულ რამდენიმე დღეში, შაბათს გამართავს. სელინის ბოლო კონცერტი 2022 წლის ტურნეს დროს ჩატარდა, სანამ მომღერალს გაშეშებული ადამიანის სინდრომს (Stiff-person syndrome) დაუსვამდნენ.

58 წლის მომღერალმა პარიზის 10-დღიანი კონცერტების სერიის შესახებ მარტში განაცხადა და აღნიშნა, რომ დიაგნოზის შემდეგ სცენაზე დაბრუნება თითქოს საკუთარი თავისთვის გაკეთებული დაბადების დღის საჩუქარია.

მას შემდეგ სელინმა შოუების რაოდენობა გაზარდა და 2027 წლის მაისის ჩათვლით 26 კონცერტს გამართავს.

"წელს ცხოვრებაში საუკეთესო დაბადების დღის საჩუქარს ვიღებ... სექტემბრიდან მეძლევა შესაძლებლობა, რომ კვლავ შეგხვდეთ და ისევ ვიმღერო თქვენთვის", — განაცხადა დიონმა მარტში — "კარგად ვგრძნობ თავს, ძლიერი ვარ, აღელვებული ვარ, ოდნავ ვნერვიულობ კიდეც, მაგრამ, რაც ყველაზე მთავარია, თქვენი მადლიერი ვარ! ყველანი მიყვარხართ და მალე შევხვდებით!"

ფოტო: Getty Images

ჯანდაცვის ეროვნული ინსტიტუტის თანახმად, გაშეშებული ადამიანის სინდრომი იშვიათი ნევროლოგიური დარღვევაა, რომელსაც კუნთების დაჭიმულობა და სპაზმი ახასიათებს. სინდრომმა შეიძლება შენელებული მოძრაობები და სიარულის გართულება გამოიწვიოს. გაშეშებული ადამიანის სინდრომის მქონე პირებს შესაძლოა აღენიშნებოდეთ ხმაურის მიმართ მომატებული მგრძნობელობაც.

მიუხედავად იმისა, რომ ამ სინდრომის სრული განკურნების საშუალება ჯერჯერობით არ არსებობს, შესაძლებელია მკურნალობა სიმპტომების შესამსუბუქებლად.

დიონმა საკუთარი დიაგნოზი პირველად 2022 წლის დეკემბერში გაასაჯაროვა და აღნიშნა, რომ დაავადება სიარულსა და სიმღერაში ხელს უშლიდა.

პარიზის კონცერტების სერიისთვის მოსამზადებლად მომღერალმა ინტენსიური ვარჯიშისა და რეაბილიტაციის კურსები გაიარა.

როგორც სელინი აღნიშნავს, ჯანმრთელობასთან დაკავშირებული პრობლემების შემდეგ, საყვარელ საქმიანობასა და სამუშაო რიტმს დიდი ენთუზიაზმით უბრუნდება.