ოკუპირებულ აფხაზეთში 12-16 ოქტომბერს მასშტაბური ოპერატიულ-ტაქტიკური სამხედრო წვრთნების ჩატარება იგეგმება — გეგმა დე ფაქტო პრეზიდენტმა და შეიარაღებული ძალების მთავარსარდალმა, ბადრა გუნბამ დაამტკიცა. ინფორმაციას გუნბას პრესსმსახური ავრცელებს.

როგორც აცხადებენ, მანევრებში მონაწილეობას მიიღებენ მუდმივი მზადყოფნის დანაყოფები, რეზერვისტები და რუსეთის ფედერაციის შეიარაღებული ძალების სამხედრო მოსამსახურეები.

წვრთნები ზაფხულის მომზადების პერიოდს დაასრულებს. გუნბას პრესსმსახურის ცნობით, საბრძოლო მომზადების პროცესში ჩართული იქნება არტილერია, ჯავშანტექნიკა და ავიაცია. განსაკუთრებული ყურადღება დაეთმობა მაღალტექნოლოგიური იარაღის, მართვის სისტემებისა და ელექტრონული ბრძოლის (EW) საშუალებების გამოყენებას.