ნინა დობრევს ვენეციის კინოფესტივალის წითელ ხალიჩაზე, როგორც ჩანს, დაჩქარება მოსთხოვეს, ამ უხერხული შემთხვევის ამსახველი ვიდეო კი ინტერნეტში ვირუსულად გავრცელდა.

ვამპირის დღიურების ვარსკვლავი პრესტიჟულ ღონისძიებაზე ფოტოგრაფებისთვის პოზირებდა, როდესაც შავ კოსტიუმში გამოწყობილი კაცი (სავარაუდოდ დაცვის თანამშრომელი) მასთან მივიდა და ანიშნა, რომ გზა უნდა გაეგრძელებინა.

მსახიობი თავდაპირველად დაბნეული ჩანდა, თუმცა შემდეგ კვლავ კამერებისკენ გაბრუნდა და პოზირება განაგრძო.

პირველი მცდელობის წარუმატებლობის შემდეგ, ნინას მეორე პირი მიუახლოვდა და, როგორც ჩანს, იმ ადგილიდან ჩამოშორებას მოსთხოვა, რის შემდეგაც დობრევი სახეზე უკმაყოფილო გამომეტყველებით გვერდზე გადადგა.

ამის შემდეგ მსახიობმა წითელ ხალიჩაზე გზა განაგრძო და ოდნავ მოშორებით მდგარ ფოტოგრაფებს ხელს დაუქნია.

ინციდენტმა სოციალურ ქსელებში ყურადღება სწრაფად მიიპყრო. ერთ-ერთმა მომხმარებელმა იხუმრა: "გუშინ ნინა დობრევის ადგილას რომ ვყოფილიყავი და ვენეციის კინოფესტივალის წითელი ხალიჩიდან ასე გავეგდე, სირცხვილისგან გავქრებოდი".

სხვებმა კი დაცვის ქცევა გააკრიტიკეს: "ყოველ წელს ვნახულობთ ვიდეოებს, როგორ აყენებს დაცვა მსახიობებს უხერხულ სიტუაციებში".

ინტერნეტის ნაწილი ფიქრობს, რომ დობრევის დაჩქარების მიზეზი მისთვის გამოყოფილი დროის გადაცილება გახდა. შესაბამისად, დაცვამ მას წითელ ხალიჩაზე ადგილის გათავისუფლება შემდეგი ვარსკვლავისთვის სთხოვა.

ნინა, რომელიც ვენეციის კინოფესტივალზე Giorgio Armani Privé-ს 2012 წლის კაბით გამოცხადდა, Vogue-მა ფესტივალის გამორჩეულად ჩაცმულ სტუმრებს შორის დაასახელა.

ფოტო: Getty